Opinionisti Ervis Iljazaj ka rikthyer edhe një herë në fokus ngjarjen e Bularatit, ndërsa ka vënë me ‘shpatulla pas murit’ Vangjel Dulen. Sipas tij, Vangjel Dule i ka hedhur benzinë zjarrit. Duke bërë një paralelizëm, për të, përfaqësuesit e minoriteteve në Shqipëri luajtën një rol negativ. Kjo me theks të veçantë në deklaratat e Dules, të cilat i quajti tërësisht si ngacmuese.
“Nacionalizmi është në trend jo vetëm në Shqipëri e Greqi, por në gjithë Evropën. Dhe në Greqi e Shqipëri është një joshje politike, që është një nga rrugët që sjell konsensus. Reagimet ishin institucionale të moderuara, dhe për të qenë të kujdesshëm në marrëdhëniet me Greqinë.
Një rol negativ luajtën edhe përfaqësuesit e minoriteteve në Shqipëri. P.sh. daljet e Vangjel Dules, deklaratat e tij i quaj tërësisht të pavend. Në vend që të shuante zjarrin, i hodhi benzinë zjarrit”, u shpreh Iljazaj në emisionin “Provokacija”, në “ABC News”.
Gjithashtu ai u shpreh se Dule, si përfaqësues i minoritetit në Parlament, nuk ngre probleme, por flet vetëm për ndasi. Ervis Iljazaj tha më tej se grekët e Shqipërisë ndihen grekë gjithë kohën.
“Grekët e Shqipërisë ndihen grekë gjithë kohën. Po ky është problemi kur përfaqësuesi i tyre në Parlament, ngre probleme vetëm të nacionalitetit grek. Ky nuk është problemi i tyre, por i atyre që e përfaqësojnë. Ata duhet të marrin pjesë në jetën publike shqiptare si qytetarë. Se shpesh flitet për këto ndasi, nuk flitet për çështje të tjera. Ata jetojnë si të izoluar, si t’u ketë rënë halli që jetojnë në Shqipëri. Ata janë shtetas shqiptarë”.
