Banorët e zonës së Astirit kanë dalë sërish në protestë, për të kundërshtuar prishjen e shtëpive të tyre. Ata janë shprehur se janë të vendosur të mos lejojnë prishjen e banesave, deri në momentin që do të marrin dëmshpërblim 100% me vlerë tregu.
Mes banorëve të Astirit dhe policëve ka pasur edhe përplasje fizike në kantierin e parë, pasi qytetarët kanë çarë rrethimin. Pas përplasjes, kanë ndërhyrë edhe Forcat e Ndërhyrjes së Shpejtë.
Një banore, teksa ka folur për News 24, ka thënë se një person u ka kërkuar banorëve të largojnë automjetet sepse është kantier ndërtimi.
“Na erdhën te lagja dhe na thanë ‘Largoni makinat nga rruga sepse është kantier ndërtimi’. Kam qenë e para në organizatat e Rilindjes, që m’u thaftë dora! U tha se shtëpitë s’do prishen sepse janë ndërtuar me gjak etj. Videoja është shpërndarë sot në gjithë rrjetet sociale. Jam nënë me fëmijë. Derisa të marrim një përgjigje, do dalim ën protestë. Deri kur u quajtën shpellarë, qytetarët ishin të qetë. Në atë moment, u bënë agresiv dhe filluan të bërtasin dhe situata do përkeqësohet nëse nuk marrim një zgjidhje. Ajo tokë është blerë, nuk është zaptuar.”
Sot, në ditën e 16-të të protestës, banorët kanë zgjedhur të marshojnë drejt sheshit Shqiponja, ndërsa kërkojnë zgjidhje për banesat e tyre, të cilat parashikon të prishen për shkak të projektit të Unazës së Re.
