Statusi i Mirela Kumbaros u kthye në meme. Komentuesit shpërthyen në komente tallëse dhe sharjesh ndaj Ministres së Kulturës. Ajo i surprizoi të gjithë me postimin e saj në Twitter, ku përdorte një shprehje skandaloze, në mënyrë që të tërhiqte sa më shumë vëmendjen për leximin e librave.
Postimi i Kumbaros ishte një shprehje e shkrimtarit të njohur John Waters, të cilin vetë ministrja nuk e përmendte në asnjë rresht. Por sot janë ndezur sërish gjakrat, teksa ministrja ka qënë e ftuar në emisionin “Wake up”. Kumbaro i është rikthyer sërish këtij debati, kur u pyet nëse ky status ishte i qëllimshëm, ose jo.
“Unë kam marrë citimin e shkrimtarit të njohur John Waters, është copy-paste. Virale bëhen dëshirat negative, jo mesazhet pozitive”, tha ministrja.
“Gjithsesi ishte një mesazh i guximshëm i thënë nga një Ministre Kulture”, iu drejtua moderatorja Ori Nebiaj.
“Edhe si ministre apo përkthyese, unë flas pareshtur për librin. Dhe është e vështirë të tërhiqet vëmendje nëse nuk kemi të bëjmë me një reklamë, apo diçka tjetër. Por nuk ishte i qëllimshëm. Lexova një artikull të Waters, i cili tentoi të provokojë shoqërinë me këtë ide. Pra në marrëdhënien në çift, pasi libri mund të jetë kriter i tjetrit. Për çdo gjë që bëni mendoni edhe kriterin e përzgjedhjes kulturore. Pra a ka ky njeri një kulturë pas”, tha Kumbaro.
“Don’t f*ck them”, zonja Kumbaro, jemi të gjithë të rritur”, tha Nebiaj. Por ministrja nuk e ka lënë me kaq, por i është kundërpërgjigjur duke i thënë se po e çudit me cektësinë e interpretimit. Madje ajo e këshillon që të lexojë më shumë libra.
“Po më habisni pak me cektësinë e interpretimit tuaj. Waters shpreh një mesazh, se një njeri i rrethuar me libra, është një njeri më i mirë. Nëse lexoni më shumë, ju bëheni një gazetare më e mirë, një shoqe më e mirë. Ky është edhe mesazhi që ju duhet të jepni në media”, tha ministrja.
