Sikundër u panë qartë edhe nga pamjet e servirura nga mediat dje LIVE, Vangjel Tavo i LSI, së bashku me Vangjel Dulen e PBDNJ, ishin dy deputetët që morën pjesë në ceremoninë mortore të Kostantinos Kacifas. Ndonëse 35-vjeçari sulmoi me armë Policinë e Shtetit, dy deputetët shkuan të nderonin të ndjerin si “hero”. Tavo dhe Dule u bënë njësh me turmën që bërtiste në mënyrë histerike kundër shqiptarëve dhe Shqipërisë. Sikundër edhe pritej, kjo ceremoni mortore u kthye tërësisht me nota politike dhe antishqiptare.
Ndërkohë që qëndrimi i PBDNJ për këtë çështje është i ditur. Ajo çfarë të çudit është fakti që LSI nuk ka reaguar ende për pjesëmarrjen e deputetit të saj në këtë ngjarje.
Kryetari i PBDNJ, Vangjel Dule nga Bularati, ku foli në greqisht dhe në shqip, tha se e vërteta për vrasjen e Kostantinos Kacifas duhet të çohet deri në fund.
“Jemi sot në këto momente të cilat janë momentet e varrimit, dhe si pasojë janë të shenjta. Jemi këtu për të ndarë dhimbjen me gocën e Kostantinos me mamanë, babin dhe gjithë komunitetin”, tha Dule para gazetarëve.
“Jemi këtu për të shprehur nderimin ndaj të ndjerit, por edhe vendosmërinë që e vërteta duhet të ndriçohet deri në fund. Transparenca e kësaj çështje, zbardhja e saj është me rëndësi jetike. Ajo mund të vonojë, por natyrisht nuk do të humbasë”.
Dule i bëri këto deklarata në prani edhe të deputetit grek të Demokracisë së Re, Savas Anastadhiasi.
Vangjel Tavo është fotografuar edhe duke u takuar me eurodeputeten qipriote, Eleni Theocharous, e cila ka mbajtur së fundmi qëndrime raciste dhe antishqiptare.
