Bashkia Dropull do të paguajë të gjitha shpenzimet e varrimit të Konstandinos Kacifas. Vendimi është marrë pas një mbledhjeje të bashkisë, ndërsa është njoftuar nga nënkryetari i Dropullit, Mihal Mano.
Ky i fundit tha se vendimi është marrë nën motivacionin se familja është e varfër dhe nuk ka mundësi për të paguar.
Trupi i pajetë i minoritarit grek mbërriti mëngjesin e sotëm në Gjirokastër. Familjarët e 35-vjeçarit u nisën dje drejt Tiranës për tërheqjen nga morgu të trupit të Kacifas, pas vendimit të Prokurorisë së Krimeve të Rënda.
Së bashku me kufomën e 35 vjeçarit, avokati Efthimios Navridis theksoi se do të marrë një kopje të Institutit të Mjekësisë Ligjore në Shqipëri për t’ua dorëzuar atë familjareve.
Ceremonia mortore pritet të bëhet nesër, të enjten në orën 13:00.
