Në Paraguai, ndeshja më e zjarrtë e sezonit ka përfunduar në një barazim 2 me 2 mes shumë polemikash. Vonesa loje, kartonë të kuq dhe 13 minuta shtesë në fundin e takimit e bënë më interesant takimin.
Megjithatë, lajmi nuk ishte ky, sepse golin e parë të ndeshjes në minutën e 16-të e shënoi Fernando Ovelar. Kush është ky? Askush, do thoni, por nëse sheh pasaportën e lojtarit, mbetesh pa fjalë.
Fernando Ovelar është vetëm 14 vjeç dhe luajti ndeshjen e dytë në karrierë, në harkun e një jave. Sulmuesi i ri kishte partner në sulm argjentinasin Diego Churin, shënuesi më i mirë në ekip, 28 vjeç, i cili me siguri është ndjerë shumë plak kur ka parë në krah një “fëmijë” që nuk lejohet as të firmosë kontratë profesioniste dhe sapo ka nisur shkollën e mesme.
Të shënosh një gol në një ndeshje të tillë është një ëndërr, por ta bësh në moshën 14-vjeçare është përtej ëndrrës, hyn në historitë e filmave të pamundur në realitet.
