Drejtorët e klubit të Leicester kanë mbërritur të gjithë me radhë në stadiumin “King Powers” këtë mëngjes, pasi klubi do të dalë në një komunikatë për shtyp në lidhje me rrëzimin tragjik të helikopterit të pronarit të tyre.
Konfirmimi për personat që kanë qenë në bord është vonuar deri më tani pasi pritet të zbardhet ekspertiza e trupave të gjetur në mjetin fluturues. Por mediat në Anglia dhe burimet e tyre kanë arritur të zbulojnë se kush ka hipur në atë helikopter pas ndeshjes Leicester-West Ham.
Sipas burimeve të afërta më familjen e pronarit të klubit të “dhelprave”, Vichai Srivaddhanaprabha vetë personi në fjalë ka qenë në bord, por nuk mbetet me kaq sepse është zbuluar se edhe vajza e tij, Voramas Raksriaksorn.
Në total kanë qenë 5 persona në bord, dy nga familja e pronarit të Leicester, dy pilotët dhe një person i 5-të, identiteti i të cilit nuk është zbuluar ende, por mendohet të jetë një drejtues në klubin e futbollit.
Rrëzimi i helikopterit dyshohet të jetë shkaktuar nga një problem teknik në motor. Dëshmitarët okularë kanë deklaruar se mjeti u ngrit në ajër mbi kupolën e stadiumit dhe më pas bëri disa rrotullime pasi helika në bishtin e tij pësoi defekt. Menjëherë pas këtij episodi mjeti është përplasur fuqishëm në parkingun e stadiumit duke shpërthyer në flakë.
Mëngjesin e sotëm është fotografuar helikopteri që ka mbetur si një hekurishte e deformuar edhe pse autoritetet e kanë mbuluar një pjesë të tij, gjithsesi mjeti fluturues do t’i nënshtrohet ekspertizës për të gjetur shkaqet e rrëzimi të tij para se të largohet nga vendi i ngjarjes.
Ndërkohë tifozë të shumtë të Leicester kanë shkuar sot pranë vendit të ngjarjes ku kanë vënë lule në nder të presidentit të tyre që me shumë mundësi do të shpallet i vdekur në orët në vijim.
Për t’u njohur më mirë me pronarin e Leicester Cityt më poshtë keni profilin e tij:
Si u bë i pasur Srivaddhanaprabha dhe sa është vlera e pasurisë së tij?
Srivaddhanaprabha ka lindur në Bangkok, Tajlandë në prillin e 1958.
Ai themeloi kompaninë gjigante të shitjes me pakicë ‘King Power Duty Free’ në Bangkok në vitin 1989, e cila më pas e bëri shumë të pasur.
Sipas Forbes vlera e pasurisë së tij është 4.29 miliardë euro. Srivaddhanaprabhas në vitin 2009 i është dhënë dekorata mbretërore nga mbreti i Tajlandës.
Kur e bleu klubin e Leicesterit?
Srivaddhanaprabha e bleu Leicesterin në gushtin e 2011 për 39 milionë funte (43.81 milionë euro). Ai menjëherë emëroi djalin e tij, Aiyawatt Srivaddhanaprabha, si zëvendës-kryetar të klubit.
Arritjet e Leicesterit nën Srivaddhanaprabhan?
Leicesteri e fitoi Premier Ligën në sezonin 2015/16 duke regjistruar kështu një nga befasitë më të mëdha në futbollin anglez. Shanset e Dhelprave para fillimi të sezonit për të fituar titullin ishin 5000 me 1, por skuadra e Claudio Ranierit i befasoi të gjithë.
Si shpërblim për titull ai i dha çdo lojtari nga një veturë BMW i8, vlera e secilës është 112 mijë euro.
A është Srivaddhanaprabha pronar edhe i ndonjë klubi tjetër të futbollit?
Po, ai është pronar edhe i klubit belg, OH Leuven, të cilët bëjnë gara në kategorinë e dytë të futbollit belg.
