Ngjarja në Bularat të Gjirokastrës, ku një ekstremist grek sulmoi me armë policinë, ka sjellë reagimin e PDIU-së.
Kjo e fundit kërkon me anë të një deklarate arrestimin e ekstremistit, sipas saj, të Agimit të Artë. Po ashtu, Partia për Drejtësi Integrim dhe Unitet ka kritikuar policinë, teksa bën një krahasim. Sipas PDIU, policia nuk lejon patriotët shqiptarë të protestojnë për fyerjet që u bëhet me varrezat greke. Ndërsa nga ana tjetër lejohet ekstremisti i “Agimit të Artë” që të qëllojë Policinë e Shtetit.
Reagimi i plotë:
Ndalohen patriotët shqiptarë të protestojnë dhe u hapet rrugë provokimit me armë të esktremistëve të “Agimit të Artë”
Policia nuk u jep leje patriotëve shqiptarë që të protestojnë për fyerjet që u bëhet të gjithë shqiptarëve me varrezat greke në Këlcyrë dhe bërjen e tyre vend pelegrinazhi për esktremistët grek të vorio-epirit. Patriotët shqiptarë si Elida Jorgoni kanë të gjithë të drejtën për të protestuar dhe ndalohen e arrestohen padrejtësisht nga Policia.
PDIU dënon këtë veprim të Rilindasve të rinj, të cilët po lëvizin nga vendprehjet e tyre Rilindasit e vjetër.
Si është e mundur që disa shqiptarë patriotë, të ndalohen të protestojnë në territorin e tyre në Këlcyrë, ndërkohë që në Gjirokastër lejohet që një ekstremist i “Agimit të Artë”, Konstatinos Kacifas, të qëllojë Policinë e Shtetit.
Është e papranueshme që një ekstremist i “Agimit të Artë” që të jetë i pranishëm në territorin shqiptar në ceremoninë e varrezave për ushtarët grekë dhe më pas ky ekstremist, qëllon Policinë Shqiptare.
Partia Drejtësi, Integrim dhe Unitet bën thirrje që ekstremisti i “Agimit të Artë” të arrestohet nga Policia.
