Një 35-vjeçar në Gjirokastër ka qëlluar me armë zjarri në ajër. Ngjarja ka ndodhur në fshatin Bularat rreth orës 10:00, ndërsa menjëherë në vendngjarje kanë shkuar shërbimet e policisë.
Shtetasi Kostandinos Kaçifa, sapo ka parë shërbimet e policisë që po afroheshin në drejtim të tij ka hapur zjarr me breshëri ndaj punonjësve të policisë duke rrezikuar jetën e tyre.
Si pasojë është thyer xhami i mjetit të policisë, por fatmirësisht nuk ka patur të plagosur. Policia ka rrethuar zonën ku përsëri ky shtetas ka hapur zjarr. Kaçifa është futur në thellësi të fshatit ku forcat “Shqiponja” dhe shërbimet e tjera të Drejtorisë Vendore të Policisë vijojnë krehjen e zonës për të bërë të mundur kapjen e tij.
Në ndihmë të shërbimeve të Policisë së DVP Gjirokastër kanë shkuar forcat speciale Renea. Shtetasi Kostandinos Kaçifa jeton në Greqi dhe ka rreth një javë që ka ardhur në Bularat.
