Ish-ministri i brendshëm Saimir Tahiri duket se po përgatit rikthimin e tij të bujshëm. Disa media duke se po “punojnë” për të. Por, sikur të mos mjaftonte kjo ai po hap një media të tijën.
Ai do të hapë një portal online që do ta quajnë “Zëri i Popullit”. Ky portal do t’i shërbejë ish-ministrit për t’u katapultuar fuqishëm në skenën politike.
Duket se Tahiri i ka marrë të gjitha masat që media e tij të jetë edhe e licensuar. Më 13 shtator të këtij vitit ai e ka regjistruar dhe si biznes në QKB.
Në të dhënat e aksionerëve shihet se ish-ministri është i vetëm në këtë media. Ky portal do hapet me një kapital fillestar prej 100 mijë lekësht, ndërsa si adresë ka dhënë rrugën ‘’Prokop Mima”, e cila ndodhet në afërsi të Komunës së Parisit.
Ditëve të fundit emri i tij është lakuar ndjeshëm për shkak se është përfolur për një përplasje nën rrogoz me Edi Ramën, ku dyshohet se Tahiri ka informacione që mund të fundosin personazhe të njohur në PS. Dje ai paralajmëroi një konferencë për mediat paraditen e sotme, po që në mënyrë të mistershme u anulua sot me lajmin e dorëheqjes së Fatmir Xhafajt.
I pyetur sot nëse konferenca e tij kishte lidhje me rastin Xhafaj, Tahiri u përgjigj se jo, dhe ato që ai do të komunikojë lidhen ngushtësisht me interesin publik.
“Dorëheqja e Xhafës? S’ka lidhje. Konferenca ka lidhje me interesin publik”, u shpreh Tahiri.
Dy ish-ministrat e Edi Ramës janë të njohur për përplasjet e kahershme mes tyre, për shkak se Xhafaj e ka denoncuar publikisht kanabizimin e vendit teksa nën drejtimin e rendit ka qenë Tahiri. Mbetet të presim ditët në vijim për të parë përplasje të tjera mbi apo nën rrogoz të socialistëve.
