Ministri Fatmir Xhafaj jep dorëheqjen në mënyrë të papritur, mu në kulmin e tij të punës, fill pas arrestimeve që tronditën politikën dhe sidomos mazhorancën. Edi Rama ka shkruar në Twitter se Fatmir Xhafaj ka dhënë dorëheqjen dhe ai e ka pranuar këtë.
Njoftimin për dorëheqjen e tij e ka pranuar kreu i qeverisë Edi Rama i cili e ka falenderuar atë për punën e bërë. Kryeministri ka nxituar ta bëjë sa më shpejt publike ikjen e ministrit.
Pikëpyetje të mëdha shtrohen para publikut në lidhje me këtë dorëheqje të papritur të ministrit të brendshëm Fatmir Xhafaj.
E para lajmin e dorëheqjes nuk e dha vetë i zoti i dorëheqjes Fatmir Xhafaj, por pikërisht kryeministri Rama. Kjo tregon se nuk është një dorëheqje normale, por e diktuar pas një sherri në nivel të lartë, ku duket se mezi e ka pritur Edi Rama, pasi e ka dhënë lajmin shumë herët këtë të shtunë dhe po herët në mëngjes ka nxjerrë krejt protokollin e kryeministrisë për të propozuar emrin e ri për ministër që është këshilltari i tij për Sigurinë.
“Koha Jonë” shkruan se fare mirë mund pritej të zgjohej populli këtë të shtunë dhe jepej lajmi i dorëheqjes nga vetë ministri Xhafaj. Por nxitimi për ta bërë fakt të kryer, në mëngjes herët, pas një sherri gjithë natën mes kryeministrit dhe ministrit, tregon se diçka e madhe ka prekur interesat e Ramës.
Duket se kryetari i shtetit nuk do ta firmosë dekretin për largimin e ministrit të brendshëm. E çdo bëjë parlamenti dhe kryeministri, do të kërkojë shkarkimin e Presidentit?! Ok, por duhen 93 vota! Ku t’i marrë? As gjykatë kushtetuese nuk ka që të bëjë interpretimin kushtetues të aktit të Presidentit nëse nuk e firmos dekretin për shkarkimin e ministrit Xhafaj.
Nuk thonë kot se kur synon t’i bësh gropën tjetrit, bie vetë brenda. Tani nuk ka gjykatë kushtetuese, Presidenti mund të mos firmos dekretin dhe Fatmir Xhafaj vazhdon ministër derisa të ngrihet gjykata kushtetuese.
Ministri me ligj dhe Kushtetutë nuk mund të braktisë vendin e punës pa dekret dhe pa miratimin të dekretit nga parlamenti.
