Largimi i Cristiano Ronaldos nga Real Madrid i ka kushtuar jo pak madrilenëve. Tashëm përgjegjësia ka rënë mbi Karim Benzema, i cili pritet të shënojë më tepër gola. Benzema është një nga lojtarët më të kritikuar. Kjo sepse francezi ka qenë i pafat në shënimin e golave.
Benzema ka pranuar se duhet të përmirësohet, ndërsa ka komentuar se si është të luash pa Cristiano Ronaldon.
“Tani nuk ka më ndeshje të lehta. Të gjithë kundërshtarët duan të marrin pikë. E rëndësishme është që morëm fitoren. Në fund të fundit njerëzit këtë kërkojnë. Trajneri? Kemi shumë besim tek ai dhe jemi të gjithë bashkë. Nuk është gjithmonë faji i trajnerit kur gjërat nuk shkojnë siç duhet. Ai zgjedh lojtarët dhe jemi ne ata që duhet t’i tregojmë gjërat në fushë. Unë e di që duhet të përmirësohem, por jap gjithmonë maksimumin për skuadrën. Ronaldo? Tani që nuk është ai, më duhet të bëj sulmuesin e parë, ndërsa me të luaja pak më i tërhequr”, thotë francezi.
