Xherdan Shaqiri do të udhëtojë në Beograd, pasi shorti i Champions-it përplasi në të njëjtin grup Liverpulin dhe Cërvena Zvezdën.
Kjo përplasje është komentuar shumë në media. Kjo pasi shqiptari festoi me shqiponjë në ndeshjen Zvicër-Serbi në Botëror. Dhe serbët, me siguri nuk e kanë harruar këtë moment.
Edhe drejtori i përgjithshëm i Cërvenës, Zvezdan Terziç, tha se Shaqirin e pret një presion i jashtëzakonshëm psikologjik kur të luhet në “Marakana”.
Megjithatë, futbollisti është përpjekur t’i zbusë notat e tensionit politik përpara ndeshjes. I pyetur nga “Liverpool Echo” nëse do të jetë i shqetësuar se do të jetë një shënjestër e tifozëve serbë, Shaqiri tha:
“Jo, aspak. Është thjesht një ndeshje normale dhe unë do ta trajtoj atë si të tillë. Sigurisht që mund të ketë disa tifozë që do të më vërshëllejnë.
Por, unë do ta trajtoj si të ishte një takim normal. Në fund është vetëm një ndeshje futbolli. Është një ndeshje e rëndësishme dhe ne duam të fitojmë. Sporti nuk është politikë”.
