Numri i migrantëve që kanë ardhur në Gjermani në vitin 2017 ka shënuar rënie. Megjithatë Gjermania mbetet një vend atraktiv, sidomos për qytetarët e BE-së. Ndërsa, shënon sërish rritje numri i të ardhurve nga Ballkani.
Në vitin 2017 kanë ardhur 416.000 njerëz më shumë, se sa janë larguar. Sipas Zyrës Federale të Statistikave në Visbaden, ardhjes së 1,551 milionë vetëve i qëndron përballë një shifër tjetër, largimi i 1,135 milionë njerëzve.
Në 2016-ën ky numër ka qenë më i lartë, pasi 500.000 vetë erdhën më shumë, krahasuar me ata që u larguan. Të huajt zënë pjesën më të madhe të të ardhurve në Gjermani, plot 90%.
Pjesa tjetër janë gjermanë, mes tyre gjermanë nga vendet e ish-Bashkimit Sovjetik. Numrin më të madh ndër të huajt e ardhur në Gjermani e përbëjnë qytetarët që vijnë prej vendeve të Bashkimit Europian. 239.000 gjithsej.
Më së shumti Gjermaninë e synojnë qytetarët rumunë (73.000), ata polakë (34.000), kroatë (33.000) dhe bullgarë (30.000) vetë.
Nga Ballkani erdhën në 2017 më shumë vetë
Në vitin 2017, ndryshe nga viti 2016, ka pasur një rritje të numrit të ardhurve nga vendet e Ballkanit. Nga Kosova kanë ardhur gjithsej 8000 vetë vitin e kaluar. Ndërsa nga Shqipëria nëse viti 2016 shënoi një rënie me 26.000 vetë të shqiptarëve, në 2017-n ky numër u rrit me 1000 vetë. Nga Serbia erdhën 6000 vetë, po kaq edhe nga Maqedonia, raporton DW.
Nga vendet aziatike kanë ardhur 140.000 vetë, nga vendet europiane jashtë BE-së kanë ardhur 60.000 vetë gjithsej, ndërsa nga Afrika 35.000 imigrantë. Ndërkohë ka rënë ndjeshëm numri i të ardhurve nga Siria, Afganistani dhe Irani.
