Champions League është kompeticioni më i rëndësishëm i futbollit për klube në Evropë dhe në historinë e saj finalja është organizuar vetëm në “kontinentin e vjetër”. Por ditët e fundit, pas deklaratës së drejtorit të “Mediapro”, Jaume Roures, filluan spekulimet se ajo do të organizohet në SHBA. Roures tha për “Radio Catalunya” se “zhvillimi i një finaleje të Ligës së Kampionëve në New York është duke u negociuar”.
Por këto pretendime janë hedhur poshtë nga presidenti i UEFA-s, Aleksandër Ceferin. Përmes një deklarate ai ka mohuar se është duke u diskutuar një ide e tillë. “Kjo ide nuk është duke u diskutuar fare” dhe se për momentin “UEFA nuk ka plane për të organizuar finalen e Ligës së Kampionëve jashtë Europës”, duke hedhur poshtë të gjitha spekulimet se New Yorku do të priste finalen e edicionit të vitit 2021.
Por që futbolli europian po kërkon vëmendje edhe në SHBA nuk është një lajm i ri, pasi është La Liga që ka miratuar zhvillimin e një ndeshje atje. Dhe nga lajmet që qarkullojnë në ditët e fundit është Barcelona skuadra e parë që do të zhvillojë një ndeshje atje, e cila do0 ta rriste shumë markën e tyre. Por zhvillimi i një ndeshje aq larg tifozëve të skuadrës është kundërshtuar nga futbollistët, të cilët kanë paralajmëruar se do të futen në grevë nëse miratohet.
