Fitorja në ndeshjen e parë të Ligës së Kombeve që mori Shqipëria duke mposhtur Izraelin 1-0 në “Elbasan Arena” ka bërë bujë në mediat botërore. Kuqezinjtë që do të përballen sonte me Skocinë në një përballje mjaft delikate, kanë tërhequr vëmendjen e BBC, e cila u ka kushtuar një analizë duke renditur disa probleme.
“Lajme të mira për Skocinë. Mesfushori me përvojë i Akhmat Grozny, Odise Roshi, sulmuesi i Levantes, Armando Sadiku dhe anësori i Rangerës, Eros Grezda do të mungojnë”-shkruan gjigantin mediatik i Britanisë së Madhe. Ndërkohë më tej BBC veçon disa nga futbollistët më të mirë të Kombëtares si: Hysaj, Strakosha e Xhaka.
Elseid Hysaj: Ai luan në nivele të larta në Serinë A në Itali me Napolin. Pasi u largua nga Empoli, 24-vjeçari, që luan në krahun e djathtë të mbrojtjes, ka tashmë vlerë prej 25 milionë paundësh. Ai është pjesë e titullarëve të klubit që luftuan për titullin kampion sezonin e fundit. Hysaj ka një përvojë të madhe në Ligën e Kampionëve.
Thomas Strakosha: Portieri i Lazios pati shumë punë të premten, pasi ju desh të kapë shtatë gjuajtje ndaj Izraelit. 23-vjeçari, që ka lindur në Athinë, dikur ishte zgjedhja e klubit italian. Ai ka zëvendësuar portierin që luajti në Euro 2016 me Shqipërinë, Etrit Berishën, që u largua nga Lazio tek Atalanta.
Taulant Xhaka: Mesfushori 27-vjeçar i Baselit shënoi golin e tij të parë ndërkombëtar kundër Izraelit. Thuhet se ai ishte objektiv i Sevillas, ndër të tjera, lojtari i rritur në Zvicër është vëllai i madh i Granit Xhakës që luan te Arsenali, me të cilin u përball në fushatën historike të Shqipërisë në Euro 2016 kundër Zvicrës.
