21 vjet pas vdekjes tragjike të Princeshës Diana, ka ende shumë dyshime, mbi aksidentin vdekjeprurës që i mori asaj jetën.
Princesha 36-vjeçare dhe i dashuri i saj Dodi Fajed, 42 vjeç, gjetën vdekjen kur makina e tyre u përplas me trafikndarëse në një tunel në Paris, mbrëmjen e 31 gushtit 1997.
Shoferi Henri Pol, që thuhet se kishte konsumuar një sasi alkooli sa dyfishi i limitit të jetuar, gjeti gjithashtu vdekjen në përplasjen fatale.
I vetmi që mbijetoi ishte truproja Trevor Ris. Hetuesit arritën në përfundimin se princesha dhe i dashuri i saj, gjetën vdekjen si pasojë e “neglizhencës së madhe” nga shoferi Henri, dhe fotografët që po ndiqnin automjetin me motoçikletë.
Përkundër kësaj, teoritë e konspiracionit vazhdojnë të rrethojnë tragjedinë – nga komplotet për vrasje, tek roli i një makine të bardhë të tipit Fiat Uno, dhe një “drite të fortë”.
Zyrtarët e Britanisë së Madhe dhe Francës, i kanë hedhur poshtë akuzat si të paprovuara. Një grup teoricienësh të konspiracioneve, akuzojnë shërbimin sekret britanik SAS për vrasjen e Ledi Dianës. Skotland Jard, nisi një hetim 4 vjet më pare, pasi një ish-ushtar pretendonte se princesha ishte vrarë nga njësia e forcave speciale britanike.
Ish-rreshteri i SAS, i njohur si ushtari N, thuhej se i kishte thënë gruas së tij se një forcë speciale ndezi një dritë të fortë, duke verbuar shoferin e Dianës dhe shkaktuar aksidentin fatal, duke përdorur një teknikë të zhvilluar për të luftuar terroristët.
Babai i Dodit, biznesmeni Muhamed Al Fajed, beson se djali i tij dhe Diana u vranë nga paria britanike, e tmerruar nga ideja e pasjes në krye të një mbreti mysliman. Javët e fundit, ka pasur pretendime të vazhdueshme se Diana ishte shtatzënë, apo se Dodi ishte duke planifikuar t’i propozonte asaj për martesë. Por gjithçka u ndërpre në mënyrën më tragjike.
Përgatiti Tirana Today
