Nuk është bërë ende një vit nga ceremonia e zhurmshme e fejesës në Zvicër e Seldi Qalliut me Mimoza Shkodrën. Këngëtarët, të cilët në një darkë familjare shkëmbyen unazat e fejesës tetorin e vitit që lamë pas, kanë zhdukur papritur çdo zhurmë të lidhjes së tyre në rrjetet sociale. Ndërkohë që miq të përbashkët flasin jo thjesht për një krizë, po për ndarje. Çifti që shfaqej kudo bashkë, fshinë gjithë fotot e përbashkëta pak ditë më parë, ndërkohë që nuk janë parë në shoqërinë e njëri-tjetrit gjatë verës.
Seldi ka reduktuar edhe postimet në rrjete sociale, por së fundmi ka thyer heshtjen, duke postuar një foto i vetëm në makinë, ku duket i mërzitur. Me një selfie ku shfaqet i veshur në të zeza, këngëtari ka preferuar heshtjen përmes këtij mesazhi të koduar, duke lënë të kuptohet se ai tashmë nuk është me Mimozën në krah. Nuk dihet se çfarë kontraditash kanë pasur, ndërkohë që e mbanin lidhjen në distancë për faktin se Mimoza jeton prej vitesh në Zvicër, ndërsa Seldi në Tiranë.
Për të qenë sa më afër njëri-tjetrit, ata praktikonin strategjinë e bashkëpunimit, duke planifikuar axhendë të përbashkët koncertesh, duke kënduar çift kudo që i ftonin. Ata u fejuan në vjeshtën e vitit 2017, disa muaj pasi kishin filluar të shoqëroheshin. Lidhja mes tyre filloi muaj më parë dhe menjëherë u spikat nga mediat. Pas këtij lajmi, këngëtarët pushtuan faqet rozë lidhur me romancën e tyre, duke qenë se Mimoza e kishte mohuar si lajm. Nuk vonoi shumë dhe historia e tyre u konfirmua me disa foto paparazzi, ndërsa pushonin në plazhin e Ksamilit. Më pas e zyrtarizuan me një ceremoni shumë private në Zvicër, me praninë e pak miqve të ftuar, kolegëve e familjarëve të tyre.
ÇIFTI MIMOZA DHE SELDI, KRIZA E PARË VETËM DY MUAJ PAS FEJESËS
Ndërkohë mediat kanë raportuar se çifti Mimoza Shkodra e Seldi Qalliu kanë pasur krizën e parë të lidhjes, vetëm dy muaj pas fejesës. Atëherë u fol se Seldi kishte hequr dorë nga bashkëjetesa në Zvicër me këngëtaren për t’u rikthyer në Tiranë. Nuk dihej çfarë e kishte detyruar Seldin, që vendosi të mos jetonte në një shtëpi me Shkodrën, me të cilin direkt pas fejesës realizoi klipin “Dashni”, me një fabul dedikuar historisë së tyre.
Mediat e Kosovës dhanë lajmin se çuditërisht Seldi u rikthye në Shqipëri pas disa muajsh qëndrimi në Zvicër pranë të fejuarës së tij. Një opsion është se mbase angazhimet e këngëtares e penalizuan që ajo ta shoqëronte të fejuarin e saj në vendin e tij të lindjes, kur dihej se përveç muzikës Mimoza ushtron edhe një profesion tjetër si teknike e laboratorit dentar.
Edhe pse ata nuk folën kurrë vetë për fejesën, lajmin e dha për mediat menaxheri i Seldit, Avni Selimi. Për këngëtarin dhe ish-lojtarin e “Big Brother” kjo ishte fejesa e dytë pas asaj me Dafina Zekën. 31- vjeçari e mbajti të fshehtë lidhjen me artisten 2 vite më të madhe në moshë. Por nuk vonoi shumë dhe ishte vetë Seldi ai që ndau i pari me miqtë fotot çift nga Zvicra, duke konfirmuar kështu lidhjen mes tyre.
Më pas, Seldi dëshmoi se marrëdhënia e tyre ishte serioze, pasi u fotografuan me familjarët e njëri-tjetrit, pikërisht me motrën e Mimozës dhe partnerin e saj. Po si lindi historia e dashurisë së Seldit me këngëtaren e hit-it “Ndarja”? Kjo lidhje bëhet publike dy vite pas ndarjes së këngëtarit nga e fejuara e parë që jeton në Suedi, Dafina Zeka. Lidhja e tij me Mimozën lindi nga miqësia si kolegë, pesë vite më parë, kur ata bashkëpunuan për duetin “Pare, pare”.
Në atë kohë, këngëtari dhe ish-lojtari i “Big Brother” Seldi ishte i fejuar me vajzën e gazetarit të njohur nga Kosova Milaim Zeka, fejesë që zgjati jo pak por pesë vite. Ajo ishte marrëdhënie në distancë, pasi Dafina jeton në Suedi dhe shpesh ajo udhëtonte në Tiranë për të takuar të fejuarin. Thuhet se koncertet e përbashkëta me Mimozën, bënë që Seldi të afrohej me të shumë, duke u larguar kështu nga Dafina. Nuk dihet saktë nëse kjo lidhje e re ka ndikuar në prishjen e marrëdhënies me ish-të fejuarën. Me Mimozën ai është parë dhe fotografuar shpesh që nga viti 2012./PANORAMA PLUS/
