Trajneri i ri i Real Madrid, Lopetegui është duke krijuar një ambient aspak të mirë për ata që ishin “të paprekshëm” në epokën e Zidane. Modric, Varane dhe tashmë Marcelo janë ata që po e vuajnë më shumë ndërrimin e trajnerit. Qendërmbrojtësi francez nuk po preferohet më në formacionin titullarë nga trajneri, pasi ai pëlqen spanjollin Nacho. Ndërsa Modric pas zërave të shumtë të merkatos është zëvendësuar nga Isco, tek i cili duket se është bazuar edhe loja e madrilenëve.
Por në fitoren e një nate më parë të Realit përballë Gironas, Lopetegui largoi nga fusha edhe Marcelon, zëvendësim që rrallë herë mund të kishte ndodhur deri sot. Ai hodhi në fushë Varane dhe në krahun e brazilianit do të luante Nacho. Por kjo mesa duket nuk është pëlqyer dhe shumë nga braziliani. Në një deklaratë pas përfundimit të ndeshjes, Marcelo është shprehur për mediat:
“ Nuk e kuptoj ndryshimin sepse nuk e kishim folur, por e respektoj. Është e qartë që një lojtar dëshiron të luajë gjithçka dhe unë u habita nga ndryshimi pasi jam në 100% tim.” Marcelo është kapiteni i dytë i Real Madridit pas Ramosit dhe ai shprehet se atmosfera në grup është mjaft e mirë dhe po punojnë shumë që të kenë sukses. “Ne kemi dy portier shumë të mirë, Keylor Navas i cili është duke dhënë më të mirën”, ndërsa sa i përket mungesës së Cristiano Ronaldos ai u shpreh: “Ronaldo është më i miri në botë dhe patjetër që është një humbje, por Bale dhe Benzema gjithashtu janë shumë të mirë.”
