U bë një kohë e gjatë që shqiptarët i kanë dhënë provat se blejnë ujin, ndonëse duhet të furnizoheshin pa ndërprerje në banesat e tyre. Sapo dëgjojnë se makina me ujë po afrohet, banorët menjëherë turren për të mbushur bidonat, kjo me një çmim me leverdi. Shumë prej qytetarëve e blejnë ujin nga autobotë që kalojnë në orare të ndryshme, në disa lagje të kryeqytetit.
Kjo zgjedhje, deri diku e imponuar, vjen për shumë arsye, për shkak të ardhjes së ujit me orare, por edhe sepse uji i blerë nga autobotet është më i lirë se ai që tgregtohet nëpër markete.
Disa autobotë janë të licencuar nga Ujësjellësi i Tiranës, për të tregtuar ujë. Por, ka të tjerë për të cilët Ujësjellësi i Tiranës thotë se po abuzojnë me cilësinë e tij, pasi i mbushin në burime të palicencuara nga Bashkia. Fotot në fjalë tregojnë realitetin e trishtë, duke na shtuar edhe më shumë pikëpyetjet mbi sigurinë e ujit, për atë çfarë pimë çdo ditë.
Kushtet higjenike të këtyre autobotëve nuk kontrollohen nga asnjë institucion i specializuar, e ndësa ata vijojnë të tregtojnë ujë të patrajtuar dhe jashtë standartit.
