Ky është një moment shumë prekës, ku një baba i sëmurë nga kanceri shoqëroi vajzën e tij në altar, teksa ishte i shtrirë në barelë, pak ditë përpara se të vdiste.
Pedro Villarin, 65-vjeç, vuante nga kanceri i mëlçisë, por pavarësisht dhimbjes, dëshira e tij e fundit ishte të shoqëronte vajzën e tij Charlotte Villarin në altar, në dasmën e saj me Mark Cordova.
Çifti i të sapomartuarve afroi me dy muaj datën e dasmës, kur ata vunë re se shëndeti i Pedro-s filloi të përkeqësohej. Ata donin të ishin të sigurtë se ai do të ishte pjesë e ceremonisë së tyre.
Pas një lufte një-vjeçare me kancerin, familja punësoi një ambulancë private, për ta shoqëruar në ceremoninë ku po zhvillohej dasma, në qytetin Las Pinas, pjesë e Rajonit të Filipineve.
Sipas planeve, z. Villarin do ta shoqëronte vajzën e tij në altar në një karrige me rrota, por ai nuk ishte mjaftueshëm i fortë, kështu që ata përdorën barelën e ambulancës.
Pedro vdiq më 12 gusht, tre ditë pas ceremonisë.
Të afërmit dhe dasmorët e ndihmuan për të tërhequr barelën drejt altarit, ndërkohë që njeriu që po vdiste, shtrëngonte dorën e vajzës së tij.
“Ky ishte me të vërtetë një moment emocionues”, tha zonja Villarin. “Një nga dëshirat më të mëdha të babait tim ishte të shihte martesën time, dhe ne ia plotësuam këtë dëshirë”.
Më vonë, vajza e tij mësoi lajmin e hidhur se babai i saj kishte vdekur, pak ditë pas ceremonisë.
Ajo tha: “Kjo dasmë i dedikohet me të vërtetë atij, ai donte të më shoqëronte në altar dhe të ishte dëshmitar në martesën time, unë isha vajza e tij e preferuar”.
Fotografia e saj duke puthur të atin gjatë dasmës, bëri xhiron e rrjeteve sociale. Gjithashtu edhe videoja e dasmës dhe fotografitë janë shpërndarë në media të ndryshme, duke prekur zemrat e dhjetëra përdoruesve.
Përshtati Tirana Today
