Sikundër është bërë traditë, edhe këtë vit fondacioni “Fundjavë Ndryshe” po ndërmerr nismën për dhurimin e çantave për fëmijët në nevojë, përpara nisjes së vitit të ri shkollor 2018-2019.
Drejtori i fondacionit “Fundjavë Ndryshe”, Arbër Hajdari ka bërë thirrje për të grumbulluar sa më shumë çanta dhe mjete shkollore për t’u ardhur në ndihmë fëmijëve në nevojë. Kujtojmë se vitin që lamë pas fondacioni ka mbledhur 10-mije çanta të cilat ua ka shpërndarë fëmijëve. Shpresojmë që këtë vit kontributi të jetë edhe më i lartë, për t’u kthyer buzëqeshjen vogëlushëve që kanë nevojë për ndihmën e përkujdesje.
“Ju njoftojmë se ka nisur fushata “Dhuro një çantë”. Fushata vijon deri në 5 Shtator. Bashkohu dhe ti. Dhuro një çantë për fëmijët në nevojë. Askush nuk do donte që fëmija i tyre të shkoj në shkollë duke përdorur një qese në vend të një çante. Stimulo dhe ti, edukimin e fëmijëve të familjes tonë të madhe”, janë këto fjalët me të cilat drejtuesi i “Fundjavë Ndryshe”, Arbër Hajdari u drejtohet të gjithë personave që kanë mundësi me kontribuar.
