Kryeministri i Kosovës, Ramush Haradinaj pas takimit urgjent me Këshillin e Sigurisë së Kosovës ka vlerësuar se situata e sigurisë në vend është e qetë. I pyetur për paralajmërimet për shpallje të autonomisë në veri të vendit, Haradinaj ka thënë se kjo është një retorikë nga Beogradi.
Deklarata e plotë
Në mbledhjen e sotme të këshillit të Sigurisë Kombëtare të Kosovës diskutuam për gjendjen e rendit dhe ligjit dhe sigurisë në vend, si dhe reflektimi i retorikës së fundit politike që ka ndodhë, pastaj reflektim i afateve kohore që lidhen me Asociacionin, por edhe informatave tjera që lidhen me rendin dhe ligjin dhe sigurinë në vend.
– Kam kërkuar rritjen e gatishmërisë e institucioneve të rendit dhe ligjit në gjithë vendin, në mënyrë që të sigurojmë rend dhe ligj, qetësi në gjithë vendin në ditët që vijnë. Me këtë nënkupton që gjendja në rend dhe ligj dhe siguria në vend është e qetë dhe stabile. Megjithatë, kemi kërkuar rritjen e gatishmërisë për veprim, në rast të çfarëdo prishje të rendit dhe ligjit në vend.
– Retorika për kufijtë ose për territoret që ndodhë në Kosovë, mendoj se është kundër reagim i një retorike që vjen nga Beogradi, gjoja për të drejtat e Serbisë në Kosovë, më konkretisht për veriun, pra kjo është thjeshtë një kundër reagim. Kjo retorikë nuk e ka qëllimin te prishja e rendit dhe të ligjit dhe të sigurisë në Kosovë, dhe duhet të ndihen të sigurt të gjithë në Kosovë për shkak të kësaj retorike, as serbët e Kosovës, as komunitetet tjera, por as shqiptarët, nuk duhet të ndihen të rrezikuar.
Është retorikë politike, publike, kundër-retorikë e një retorike që vjen.
– Sa i përket Asociacionit të Komunave me shumicë serbe: Kosova është brenda obligimeve të veta, që nënkupton më datë 4 gusht është afati kur dorëzohet transkripti i grupit punues për draftstatutin. Kjo është dinamika kohore. Pra, nesër grupi punues mund ta dorëzojë transkriptin për punën për draft-statutin.
– Ne qëndrojmë brenda obligimeve, nuk kemi dal nga obligimet qofshin në dialog, pra nga obligimet në Brukselit, por as nga Kushtetuta dhe ligjet tona.
Procedura nga marrëveshjet në Bruksel parasheh që kjo të bëhet para palëve, në këtë rast edhe para BE-së, edhe para palës serbe, edhe para palës së Kosovës, në këtë rast shefit të negociatave.
Kështu që, ne kur e marrim transkriptin, ne japim kontributin tonë, por edhe duhet të sigurohemi që është brenda ligjeve dhe Kushtetutës së vendit.
Për këtë, nuk ka askush të drejtë të ndërmarrë veprime të njëanshme. Askush! Pse? Sepse asnjë thyerje, asnjë dalje nga obligimet nuk ka bërë Kosova.
Nëse dikush do të merrte ndonjë veprim të njëanshëm, atëherë ai veprim është jashtë ligjeve të Kosovës, edhe jashtë marrëveshjeve ndërkombëtare dhe ai veprim do ta merrte përgjigjen e organeve të rendit dhe të ligjit. Një veprim i tillë do ta marrë përgjigjen e organeve të rendit dhe ligjit. Pse? E përsëris edhe njëherë. Kosova është brenda marrëveshjes ndërkombëtare, pra ka respektuar obligimin e marrëveshjes ndërkombëtare dhe Brukselin, respekton ligjet e veta dhe Kushtetutën e vet.
Nëse dikush del jashtë edhe marrëveshjeve ndërkombëtare në këtë rast, edhe ligjeve të Kosovës, atëherë ligji do të vepron me seriozitetin e vet, e këtu nuk ka dilemë. Nëse dikush ka dilema këtu, gabohet, pra do ta marrë përgjigjen e vet.
– E fundit, persona të caktuar të dyshimtë, që është konstatuar se qarkullojnë në Veri, që mund të jenë nga Republika Serbska ose nga zonat tjera. Ne çdoherë kemi mirëpritur ardhjen e të gjithë qytetarëve të lirë të botës te ne, edhe janë të mirëpritur në çdo pjesë të Kosovës. Janë procedurat e udhëtimit, e dimë si shkojnë, por nuk kemi shprehur ndonjë paragjykim. Kushdo që hyn brenda territorit të Kosovës, me qëllim qoftë të shkaktimit të ndonjë incidenti, prishjes së rendit dhe të ligjit, normal që do ta marrë reagimin e institucioneve të rendit dhe të ligjit. Këtu s’do të ketë dilema.
