Ai ishte vetëm 19 vjeç kur kreu një krim të rëndë duke vrarë shokun e tij. Bëhet fjalë për shqiptarin Gazmend Nure, tani 39-vjeç, i cili është ekstraduar nga Spanja për në Itali, aty ku pritet të vuaj 22 vite burg për krimin e rëndë.
Krimi ka ndodhur më 1 gusht 1998, ku me anë të një kaçavide ai kishte vrarë në mënyrë brutale bashkatdhetarin e tij Luan Kaja. Ky i fundit ishte dërguar në gjendje kome në spital, pasi kishte marrë një goditje serioze në kokë. Falë një miku të viktimës u bë i mundur dhe identifikimi i agresorit. Por, fatkeqësisht Luan Kaja nuk mundi t’u mbijetonte plagëve të marra dhe vdiq 18 ditë pas sulmit. Miku i viktimës, një dëshmitar okular i ngjarjes, u kërcënua me armë nga vrasësi, sepse ai ishte përpjekur ta ndalonte atë. Më 28 prill 2003, Nure, i cili ndodhej në arrati u dënua nga Gjykata Assizes e Brindisit me burgim të përjetshëm.
Dënimi më vonë u reformua nga Gjykata e Assizes e Apelit të Leçes në 22 vjet burg për vrasje, dhe kërcënime ndaj dëshmitarit. Ndërsa krimineli shqiptar për të humbur gjurmët kishte përdorur emrin Lorenzo Backa, ai u arrestua në Spanjë dhe u dënua nga Gjykata e Barcelonës me 18 vjet burg për një vrasje në tentativë dhe posedim të paligjshëm të armëve. Tashmë ai do të vuaj edhe 22-vite burg në Itali.
Burimi: trnews.it
Përshtati: Tirana Today
