Këtë martë në Memaliaj, një konflikt për motive të dobëta çoi në plagosjen e dy personave. Autor i kësaj ngjarjeje është Bledar Salaj, 26 vjeç, banues në Drizdar të Mallakastrës.
“Ai dyshohet se rreth orës 16:30, në kullotat e fshatit ” Buzkalemaj” pas një konflikti për motive të dobëta, ka goditur me mjet prerës shtetasit A.M 50 vjeç dhe K.M, 20 vjeç,(babë e bir) banues në Memaliaj, të cilët janë transportuar në spital ku ndodhen jashtë rrezikut për jetën”, thotë policia në një njoftim për mediat.
Menjëherë pas ngjarjes, blutë e Memaliajt u vunë në kërkim të autorit dhe e kapën atë në pyllin e fshatit Buzkalemaj.
“Kjo ndërhyrje në kohë rekord e policisë ka bërë të mundur parandalimin e përshkallëzimit të një konflikti të mëtejshëm mes të afërmve të palëve, pasi autori kishte ardhur nga Fshati Drizar i Mallakastrës me bagëti në kullotat e fshatit Buzkalemaj”, sqaron më tej në njoftimin e saj policia.
