Duket se nuk ka mjaftuar dënimi i Skënderbeut, të cilin UEFA e bëri shembull për dyshime për trukim në bazë të luhatjes së koeficienteve. Korcarët vazhdojnë gjyqin në CAS me UEFA-n për të hequr dënimin 10 vjeçar për të mos marrë pjesë në kompeticionet europiane.
Por duket se ky mësim për Luftëtarin nuk vlen, pasi ekipi gjirokastrit dhuroi një shfaqje të shëmtuar një ditë më parë në ndeshjen e tureve të Europa League përballë letonezëve të Ventspils. Ndeshja përfundoi 3-3, por luhatjet e koeficentëve në kompani të ndryshme bastesh kanë qenë të pazakonta dhe që lënë hapësirë shumë të madhe për dyshim. Por përpos kësaj, goli i tretë i shënuar nga miqtë në kohën shtesë ishte një amatorizëm i treguar nga lojtarët në fushë, që dukej se nuk ishin më aspak të interesuar për topin.
Që para se Luftëtari të shënonte golin e parë me penallti përmes Shkurtajt, kompanitë e basteve në Europë nisën luhatjet e kuotave jashtë çdo logjike. Kulmi arriti në minutën e 40-të, kur në vend që të kishte një ecuri krejt normale në kuotim, pasi Luftëtari po udhëhiqte 1-0, goli i radhës i letonezëve shkoi deri në 1.2. Dhe ndodhi ajo që pritej, Ventspils shënoi, por nuk mjaftoi me kaq. Thuajse i njëjti koeficient u mbajt edhe pas minutës së 40-të dhe sigurisht në fushë u konkretizua me golin e avantazhit të letonezëve dhe gjithçka për pjesën e parë u mbyll me shifrat 1-2.
Lëvizjet e koeficientëve vijuan të ishin me një luhatje të pabesueshme në pjesën e dytë, aq sa kompania e famshme e basteve, “Bet365”, u detyrua të hiqte çdo kuotim nga minuta e 54-t deri në të 64-ën, kur dhe Luftëtari shënoi dy gola të shpejtë. Në minutën e 64-t, kur rezultati ishte 3-2 për gjirokastritët, që shënonte golin e radhës Ventspils koeficienti ishte vetëm 1.36. Ndërsa çuditërisht, që Luftëtari shënonte golin e katërt për 4-2, koeficienti ishte plot 12. E pabesueshme, për më tepër në një ndeshje që Ventspil kishte mbaruar punë me kualifikimin.
Por, ndodhi që ajo parashikohej dhe drama e madhe ishte në minutat e fundit. Në minutën e 90-të, që shënon Ventspils, koeficienti shkoi 1.83, diçka absurde për faktin se në këtë moment të lojës, aq më tepër kur rezultati është 3-2, udhëtuesi duhet ta ketë shumë më lartë. Absurditeti shkonte deri aty, saqë për Luftëtarin goli ishte mollë e ndaluar, madje me një koeficient 29 kur rezultati ishte 3-2. Kësisoj, shtesa prodhoi skenën e turpshme dhe Ventspils shenoi.
Barazimi 3-3 me siguri ka mbushur xhepat e atyre që e kanë goditur çmendurisht në kompanitë e basteve këtë takim, duke çorientuar edhe këto të fundit me luhatje të papara gjatë lojës.
