Franca u shpall kampione Bote një ditë më parë, pasi mposhti Kroacinë me rezultatin 4-2 në finalen e Moskës. Por edhe kjo ndeshje nuk ka kaluar pa polemika, ku më shumë zhurmë ka bërë ajo penallti e akorduar nga arbitri argjentinas Nestor Pitana në fundin e pjesës së parë.
Pitana, ka gabuar rëndë kur gjykoi si penallti prekjen me dorë brenda zonës të Ivan Perisic. Të këtij mendimi janë të gjithë ish-futbollistët e mëdhenj si Roy Keane, Jamie Carragher, Joey Barton dhe Alan Shearer e Gary Lineker, që kanë vlerësuar si absurd gjykimin e Pitanas, i cili vendimin e mori pasi shikoi video-xhirimin e VAR.
“Kroatët merituan më shumë se kjo. Me vjen keq për atë vendim të penalltisë, absolutisht i turpshëm”, deklaroi Keane.
Ish mbrojtësi i Liverpoolit dhe Kombëtares angleze, Jamie Carragher, e fajësoi direkt referin për penalltinë.
“Mos e fajësoni këtu VAR-in, këtu fajtor është vetëm arbitri. VARi vetëm ka treguar pamjet, arbitri e mori vendimin.”
“Kur nuk je i sigurt për penallti, atëherë më mirë është të mos e referosh”, deklaroi Jurgen Klinsmann.
“Nëse mendoni që kjo ishte penallti, atëherë ose je francez, ose kurrë nuk ke luajtur futboll”, tha Joey Barton.
Ndërkaq futbollisti legjendar anglez Gary Lineker. “Oooo, jo. Nuk mund ta gjykosh këtë si penallti”, ka vlerësuar Lineker.
