Nga Lorenzo Tondo & Stephanie Kirchgaessner, “The Guardian”/Fitorja elektorale e Matteo Salvinit në rajonin jugor të Kalabrisë, në zgjedhjet parlamentare të 4 marsit, u mbështet nga një ish-politikan, për të cilin autoritetet ligj-zbatuese kanë deklaruar se ka lidhje të ngushta me Ndrangheta-n, organizata kriminale që kontrollon pjesën më të madhe të trafikut së kokainës në Evropë.
Ministri i Brendshëm i të djathtës ekstreme, dhe drejtuesi i Lidhjes, i cili është shfaqur në publik si një kryeministër de fakto, e fitoi vendin e tij senat me mbështetjen e ish-kryebashkiakut të Reggio Calabria, Giuseppe Scopelliti, me të cilin Salvini kishte një aleancë politike, dhe që u arrestuan disa javë pas zgjedhjeve të marsit, me akuzën e falsifikimit të dokumenteve, ndërsa ishte kryetar i bashkisë.
Në një rast të mëparshëm gjyqësor ndaj mafias, në të cilin ai nuk u akuzua, Scopelliti u përshkrua në dosjen hetimore si “i sponsorizuar” nga një prej klaneve qeverisëse të Ndranghetas.
Prokurorët gjithashtu pohonin në dokumentet e konsultuara nga “The Guardian”, se klanet më të fuqishme kriminale në zone, luajtën një “rol vendimtar” në karrierën politike të Scopellitit.
Nuk ka asnjë të dhënë, se Salvini ka lidhje të drejtpërdrejta me organizatën kriminale. Por “The Guardian” ka shqyrtuar lidhjet e Salvinit me individë, të cilët supozohet se kanë lidhje të ngushta me Ndrangheta-n, për shkak të rolit të ministrit të Brendshëm, që mbikëqyr zbatimin e ligjit dhe sigurinë e brendshme në vend.
Këto pretendime, erdhën pasi Salvini u përpoq të prezantonte të martën prioritetet e tij në luftën kundër mafias, duke u larë në një pishinë në oborrin e një vilë toskane, që i ishte konfiskuar një mafiozi.
Më pas, ministri bëri një xhiro në pishinë. Vila i ishte marrë një bosi të mafias në vitin 2007 pas 24 vitesh procedurash gjyqësore, dhe ishte shndërruar në një resort turistik.
Salvini është angazhuar gjithashtu në një debat publik, me një nga aktivistët më të spikatur anti-mafia të Italisë, shkrimtarin Roberto Saviano. Javën e kaluar, Salvini kërcënoi të hiqte mbrojtjen e policore për Savianon, megjithëse ky i fundit gjendet nën kërcënimin e Camorra-s, qëkur ai botoi librin e tij “Gomorrah” në vitin 2006, duke zbuluar detaje rrëqethëse rreth mafies në Napoli.
Giovanni Tizian, një gazetar kalabrez i “L’Espresso”, i cili jeton nën mbrojtjen e policisë që nga viti 2011, pasi u kërcënua nga Ndrangheta, tha për “The Guardian” se përfitimet elektorale të Salvinit në Kalabri – nga të mos paturit pothuajse asnjë mbështetje 5 vjet më parë, deri në fitimin e vendit në senat – erdhi pas mbështetjes nga njerëz me një të kaluar të trazuar dhe një histori të errët politike”.
“Nuk kishte rëndësi nëse Scopelliti, ishte zgjedhur më herët me mbështetjen e klaneve mafioze, siç kanë zbuluar hetimet. Scopelliti ishte popullor, dhe kishte mijëra mbështetës”- tha Tizian.
Nuk ka dëshmi se Salvini dhe Scopelliti, kishin një marrëdhënie të ngushtë personale. Marrëdhënia e Lidhjes me Scopellitin, thuhet se u menaxhua nga koordinatori rajonal i partisë në Kalabri, Domenico Furgiuele, vjehrri i të cilit, një ndërtues hotelesh, ishte dënuar më parë për krime të lidhura me mafien.
Kur u pyetën për lidhjet midis Lidhjes dhe Ndranghetas, Salvini u tha gazetarëve se ai ishte i interesuar vetëm për fushatën kundër mafies. Që kur u bë ministri i brendshëm, Salvini ka thënë se lufta kundër mafies është një nga prioritetet e punës së tij.
Por ai gjithashtu ka bërë dy propozime politike, nga ku mund të përfitojnë individët e përfshirë në krimin e organizuar:eliminimin e një kufiri lidhur me transaksionet në para të thata, e cila ndihmon në frenimin e pastrimit të parave dhe evazionit fiskal, si dhe një amnisti të gjerë të individëve që janë duke u hetuar për mashtrim tatimor – nën një kufi të caktuar – si pjesë e një plani për “paqen fiskale”. Ky plan u rrëzua nga Lëvizja Pesë Yjet.
PËRSHTATI TIRANA TODAY
