E ardhmja e Mauro Icardit në çdo merkato është mjaft e diskutueshme dhe këtë verë nuk mund të ndodhte ndryshe. Por ajo që ka bërë më shumë bujë është kalimi i tij tek rivalët e urryer të Juventusit. Ka qenë Maxi Lopez ai që ka folur për këtë temë dhe ka zbuluar një të fshehtë për sulmuesin e Interit, që duket se nuk do të jetë më pjesë e klubit zikaltër sezonin e ardhshëm. “Wanda Nara kërkon ta largojë Mauro nga Interi edhe pse gjithçka mund të ndodhë. Për mua ajo po punon për t’i gjetur një ekip të ri sulmuesit. Është menaxherja e lojtarit dhe kujdeset për imazhin e tij”, tha Lopez.
Më tej, sulmuesi i Udinese në Serinë A, shtoi se Wanda Nara ka patur një takim sekret me drejtuesit e Juventusit, ku ka biseduar për të ardhmen e Mauro Icardi dhe për ta tranfseruar lojtarin te kampionët e Serisë A. “I ka takuar drejtuesit e Juves, por e shoh si të vështirë një shkëmbim “kokë më kokë” me Higuain. Nuk besoj se Higuain do të lërë Juventusin për Interin, ndaj po kërkon rrugë të reja për ta realizuar transferimin”, tha Maxi Lopez.
