Një mesazh zanor që Diego Simeone i ka nisur ndihmësit të tij German Burgos është bërë publik dhe ka tronditur themelet e kombëtares së Argjentinës. Ai është publikuar në emisionin radiofonik spanjoll “El Transitor” i “Onda Cero”. Bëhet fjalë për një material audio dy minuta të gjatë, ku analizohet humbja e Argjentinës kundër Kroacisë.
“Ajo që po ndodh me kombëtaren është rezultati i punës së keqe që është bërë në katër vitet e fundit. Ka anarki, mungojnë lider nga ana e federatës dhe nga ana e atyre që drejtojnë skuadrën. Ekipi ka humbur rrugën: duhej të kishte luajtur kundër Islandës, që është një skuadër më e dobët, me lojtarët që kanë luajtur kundër Kroacisë. Dhe në të kundërt, duhej të kishte luajtur kundër Kroacisë, ashtu siç ka luajtur kundër Islandës. Skuadra është keq, shumë keq. Por besoj se Argjentina do të kualifikohet.
Do të kalojë, sepse Nigeria do të mundë Islandën dhe Argjentina do të ketë mundësinë të kualifikohet duke mundur Nigerinë, gjithmonë nëse Islanda nuk do të fitojë kundër Kroacisë. Gjithsesi, nuk mund të vazhdohet në këtë mënyrë”, ka thënë Simeone.
“Të flasim për portierin, German, më thuaj të vërtetën: kishte gabuar më parë. Gaboi kundër Spanjës, gaboi kundër Italisë, kur u zhvendos nga shtylla dhe unë të thashë ‘është për të ardhur keq që nuk i shënuan, sepse kështu nuk do ta kuptojnë se nëse bën një gomarllëk të tillë në Botëror, do të pësojë gol’. Më pas është e vërtetë se lojtarët janë aspekti më i rëndësishëm i kësaj loje. Ne që kemi luajtur e dimë mirë këtë. 60% e përgjegjësisë është e tyre, por jo 90%, sepse kur ne trajnerët bëjmë një gomarllëk, është shumë herë më keq se kur e bëjnë lojtarët. Trajneri merr pjesë, dhe shumë, në këtë proces.
E gjitha kjo na shërben për të kuptuar se Messi është shumë i mirë, por është e qartë sepse është i rrethuar me lojtarë të jashtëzakonshëm. Të bëj një pyetje: ‘Kë do të zgjidhje mes Ronaldo-s dhe Messi-t?’”. Përgjigja mbetet pezull, por retorika me të cilën është formuluar lë të kuptohet se është në favor të portugezit. Një mesazh zanor që po bën xhiron e botës. Edhe pse të gjithë duan “Cholo”-n në stolin e “Albiceleste”. Herët ose vonë do të ndodhë.
