Franca ka fituar betejën e parë në Botëror përballë Australisë me shumë vështirësi, me rezultatin e ngushtë 2-1. Dy penallti dhe një autogol vendosën në sfidën e parë të grupit C, tre pikë të vuajtura për francezët dhe kjo falë mbrojtjes së organizuar të “kangurëve”.
“Gjelat” e nisën ndeshjen në sulm dhe kërkonin që ta zhbllokonin sfidën që në minutat e para, duke i besuar talentit të madh që kanë lojtarët sulmues. Është mjaft e vështirë t’i bësh ballë një reparti ofensiv, që përbëhet nga emra të tillë si Griezmann, Mbappé dhe Dembélé, “tridenti” startues i Francës. Por sulmet e shumta dështuan në pjesën e parë dhe mbetën vetëm kërcënime.
Ndërsa në pjesën e dytë, vetëm 10’ minuta pasi filloi, me ndihmën e VAR-it Franca gjen golin e parë nga pika e bardhë e penalltisë me Antoine Griezmann.
Festa nuk zgjat shumë për francezët, pasi Umtiti bën një gafë të madhe në mbrojtje duke e larguar topin me dorë nga zona. Pas 4’ minutash Australia gjen golin e barazimit nga pika e bardhë e penalltisë me Jadinak, ashtu si e pësuan.
Deschamp ndërhyn në formacion duke freskuar forcat në sulm dhe efekti vjen menjëherë, ku Fekir dhe Giroud i japin më shumë grintë sulmit me aksione të rrezikshme. Vetëm 10’ minuta nga fundi është Pogba ai që zgjidh ndeshjen me një gol mjaft të bukur.
Një ndeshje e vuajtshme për francezët të cilët janë radhitur edhe në anën e pretendentëve për të fituar Botërorin, krah Brazilit, Gjermanisë dhe Argjentinës.
