Ambasadorja Romana Vlahutin, ka kërkuar vetëm durim sa i takon rezultateve të Reformës në Drejtësi. Sipas saj, nuk ka kthim pas, ndaj pritet me interes ndryshimi pozitiv për të gjithë, që prokurorët dhe gjyqtarët të kenë më shumë kualitet në vendimet e tyre.
Në prezantimin e Euralius V, projekt i asistencës teknike ligjore i financuar nga BE, që synon forcimin e sistemit shqiptar të drejtësisë, Vlahutin tha se ndryshimi kërkon kohë, dhe se do të jenë të duruar për të parë rezultatet e kësaj reforme në vendin tonë. Ajo tha më tej se gjithçka mund të arrihet, por duhet guxim.
“Euralius V është një mundësi mjaft e mirë, për të siguruar implementimin e Reformës në Drejtësi. BE do të japë një ekspertizë mjaft të mirë. Të gjitha mund të arrihen vetëm me guxim, dhe unë them le ta bëjnë diçka të tillë.
E kam thënë që reforma në sistemin e drejtësisë është një instrument mjaft i mirë, për çështjet e sigurisë dhe le të besojmë se ndryshimi është i mundur. Duhet durim, padiskutim por ajo që është e rëndësishme është se nuk ka kthim pas. Sistemi i drejtësisë në Shqipëri, është një realitet dhe ne jemi të duruar për të pritur ndryshimin në progres për të gjithë të ardhmen, që prokurorët dhe gjyqtarët të kenë më shumë kualitet në vendimet e tyre”, u shpreh Vlahutin.
