Nga: Marsela Sinani
Ju ka ndodhur që t’ju kenë vjedhur celularin nga dora në mesin e ditës, apo biçikletën? Mua po! Hera-herës më dukej vetja njeriu më i pafat në botë, por nga ana tjetër, qetësohesha pasi mendoja se policia e cila nëpër kronikat që shfaqen në media, është gjithmonë në krye të detyrës, dhe për mua do bënte diçka.
Por jo, këtu gabova sërish. E dorëzuar shpirtërisht, i drejtohem rajonit të policisë, për të bërë një kallëzim. Teksa ditët kalonin, e unë prisja për një thirrje nga policia, asgjë nuk ndodhi. Pasi humba shpresat, thash “pastë dorën e mbarë” dhe me kaq e lash këtë problem.
Por për fat të keq, edhe miku im ndante të njëjtin hall me mua, pasi atij i vidhnin në dritë të diellit biçikletat. Është drejtori Ekzekutiv ALO 116, Mirgit Vataj, i cili mjaft i rebeluar ka ndarë këtë shqetësim me të gjithë miqtë e tij në rrjetet sociale, duke e shoqëruar foton me një status.
Vataj thotë për “Tirana Today” se ky është një rast i përsëritur, dhe gjithçka ka ndodhur brenda një viti.
Për fatin e keq, policia po merret me “peshkun e madh” dhe ka harruar “cironkat” që vjedhin ngado. Unë i kam humbur shpresat tek policia, pasi asgjë nuk u bë për dy celularët e mi.
Si unë, janë me dhjetëra raste. Do vijoj të blej celularë? Sigurisht që po! Celulari është një mjet pune, por për ta përfunduar me diçka më argëtuese, sepse kjo çështje është për të shkulur flokët: Kur shkojmë në polici, lëmë edhe hajdutin pa punë.
Kjo në rast kur policia vihet në lëvizje! Për këtë e kam fjalën, jo kur fle gjumë!
Tirana Today
