Është trumbetuar shpesh kohët e fundit, se rezultatet konkrete në luftën kundër krimit të organizuar dhe korrupsionit, do ta shpejtonin integrimin e Shqipërisë dhe hapjen e negociatave. Prishtmëritë e qytetarëve kanë qenë të larta, kjo pas shpresës së përçuar nga ambasadori Lu dhe jo vetëm, për kapjen e peshqve të mëdhenj.
Sot Llalla i shpëtoi Vettingut, duke na dhënë shuplakën e radhës se deklaratat e ambasadorëve nuk “pinë ujë”. Duket sikur po bëjnë lojëra fjalësh, por “peshqit” e mëdhenj po i shohim me lupë, e ndërsa cironkat hidhen në grep. Ato po që janë suksesi jonë.
Në vigjilje të vitit 2018, opinioni publik shtoi pritshmëritë e rezutateteve të Vetting-ut dhe luftës kundër krimit të organizuar. Një ndër deklaratat e ambasadorit Lu, ndër më të komentuara ishte se ka ardhur koha të kapim “peshkun e madh”. Ndonëse u trajtua me doza humori, tashmë ne e kemi marrë mësimin se për çfarë flitej.
Ish-prokurori i Përgjithshëm, Adriatik Llalla, nuk do ti nënshtrohet Vettingut. Kolegji i Posaçëm i Apelimit rikonfirmoi sot vendimin e KPK-së, për ndërprerjen e Vettingut ndaj ish-kryeprokurorit.
“Trupa gjykuese vendosi me shumicë të votave të anëtarëve të tij, ndryshimin e vendimit numër 2, datë 16.02.2018, të Komisionit të Pavarur të Kualifikimit si më poshtë:
1-Ndërprerjen e procesit të rivlerësimit ndaj subjektit të rivlerësimit Adriatik Llalla.
2- Ndalimin e emërimit të Adriatik Llallës gjyqtar apo prokuror i çdo niveli, anëtarë i Këshillit të Lartë Gjyqësor apo Këshillit të Lartë të Prokurorisë, Inspektor i Lartë i Drejtësisë, prokuror i Përgjithshëm për një periudhë prej 15 vitesh. Ndaj këtij vendimi, subjekti i rivlerësimit ka të drejtë të ushtrojë ankim në Gjykatën Europiane të të Drejtave të Njeriut. Brenda 30 ditëve do të publikohet vendimi i plotë, i arsyetuar dhe mendimi i pakicës”.
Ish-kryeprokurori nuk mori pjesë në seancat e zhvilluara, ndërsa pasi lëshoi një prokurë, u përfaqësua nga avokati i tij Sokol Hazizaj.
Nëse kthehemi pas në kohë, në përfundim të mandatit të tij si Prokuror i Përgjithshëm dhe pas largimit nga ky post, Adriatik Llalla u sulmua nga ambasadori amerikan, i cili e kërcënoi me Vetting dhe me burg.
Në muajin shkurt të një viti më parë, kur Llalla ishte i ftuar në emisionin “Opinion” të Blendi Fevziut, lëshoi akuza të forta ndaj ambasadorit Lu, kur tha se atij dhe bashkëshortes iu refuzua viza, ndërsa këtë e mori si shantazh të ambasadorit Lu. Më tej, Llalla sqaroi se ishin shantazhet e vazhdueshme që i bëheshin atij edhe nga kriminelët e bandat, që e detyruan të largonte familjen nga Shqipëria.
