Dyshimet e para flasin për një krim pasioni, pas vrasjes së 19-vjeçares. Nga të dhënat e para ende jo zyrtare, thuhet se mes dy të rinjve që kanë pasur një lidhje intime, dhe pas refuzimit nga ana e vajzës, ka patur një sherr.
Djali e ka vrarë atë në trotuar dhe më pas ka kapërcyer vendin, dhe ka qëlluar veten në kokë me armë, në zonën e mbuluar nga disa pemë.
Ngjarja ka ndodhur rreth orës 08:10 të mëngjesit, në zonën e “Don Boskos” në Tiranë. Mësohet se vajza e re ka vdekur në vend, ndërsa djali ndodhet në spital në gjendje të rëndë shëndetësore.
Viktima është vajza 19-vjeçare Xhuljeta Çuni, me origjinë nga Vinjolli i Kurbinit, ndërsa autori i cili ka mbetur i plagosur është Xhafer Mata, nga Kalimashi i Kukësit, dhe të dy jetonin në Tiranë.
Rreth 21 orë para se të ndodhte kjo ngjarje, autori ka postuar në Facebook një poezi me dedikim dashurie.
Grupi hetimor ndodhet në vendngjarje dhe po punon për zbardhjen e rrethanave dhe shkaqeve të ngjarjes.
Njoftimi zyrtar i policisë
“Më datë 08.06.2018, rreth orës 08:10, në zonën e Don Boskos, ne rrugen “Eshref Frasheri”, shtetasi Xh.M., 31 vjeç, dyshohet se ka qëlluar me armë zjarri pistolete shtetasen Xh.Ç., rreth 19 vjeçe, e cila ka ndëruar jetë në vendngjarje.
Autori më pas ka qëlluar dhe veten me armë zjarri, ku aktualisht është transportuar ne spital ne gjendje te rende per jeten.
Grupi hetimor ndodhet në vendngjarje, dhe po punon për zbardhjen e rrethanave dhe shkaqeve të ngjarjes”.
Ky është rasti i dytë brenda këtij viti, ku një djalë kryen vrasje për krim pasioni. Në fillim të vitit, Aldison Belulaj qëlloi me pistoletë studenten e drejtësisë, Ariela Muratin, dhe më pas pistoletën e drejtoi nga vetja.
