Kryetari i Kuvendit, Gramoz Ruçi dhe kreu i Partisë Demokratike, Lulzim Basha, duket sikur po luajnë si macja me miun. Shfaqja e rrugaçërisë e gjuha ordinere, është pasqyra e përgjithshme e asaj që të ofron Kuvendi shqiptar, e ndërsa luajnë me mjaft mjeshtëri, duke u fshehur pas kartës së integrimit në BE.
Mos dorëzimi i foltores nga Basha, nuk është se ka trazuar shumë ujërat nga ana e palës kundërshtare, e në përpjekje për të ngritur kokën, kanë sjellë si risi Facebook-un. Sikundër dhe herët e tjera, në përpjekje për të marrë vemendjen, Basha ngriti zërin duke përsëritur sërish të njëjtat akuza.
Kjo lojë e cila nuk të ofron më surpriza, është kthyer në një hakmarrje të hapur me lidervë, e zëri i çjerrë dëshmon se rezultati është zhgënjyes. Për hir të së vërtetës, ora e llogaridhënies nuk është vetëm për Xhafajn, Ramën, Tahirin, etj…por është shenjë alarmuese që ata luajnë me qytetarët, duke i rënë daulles çdo të enjte.
Edhe shakatë pa kripë kanë një afat të caktuar, e duket se kësaj klase politike i ka ardhur skadenca. Nëse është risi për PD-në droni dhe rrjetet sociale, atëherë na duhet të presim për një kohë të gjatë, por shumë ama, për të mos filluar avazin, avazin e çdo të enjteje./M.S
Tirana Today
