Komisioni i Pavarur i Kualifikimit, ka rikonfirmuar në detyrë gjyqtaren e Kurbinit, Marçela Shehu. Gjatë seancës së shkurtër që është mbajtur gjatë paradites së sotme, juria është shprehur se Marçela është e pastër dhe konfirmohet sërish në detyrë.
“Në përfundim të procesit të rivlerësimit të zonjës Shehu, trupa gjykuese e përbërë nga Brunilda Bekteshi, Lulzim Hamitaj, Olsi Komici, vendosi konfirmimin në detyrë të Marçela Shehut, me funksion gjyqtare pranë Gjykatës Gjyqësore të Rrethit Kurbin”, u shpreh kryesuesja e trupës gjykuese.
Duke iu referuar hetimeve të bëra nga KPK, Shehu rezultoi e pastër në tre kriteret, atë të vlerësimit të pasurisë, kontrollit të figurës dhe vlerësimit profesional.
Gjyqtarja e Kurbinit, Marçela Shehu, është kandidate për në Këshillin e Lartë Gjyqësor. Ajo ka mbaruar Shkollën e Magjistraturës, dhe pasi punoi për pak muaj në Gjykatën e Tiranës, u emërua gjyqtare e Gjykatës së Kurbinit, pozicion të cilin e mban edhe sot.
