Një konflikt për motive të dobëta, për pak sa nuk përfundoi në tragjedi një natë më parë në kryeqytet. Policia e Tiranës ka mundur të zbardhë ngjarjen e ndodhur mbrëmjen e së dielës në bulevardin “Bajram Curri”, ku pati të shtëna me armë zjarri.
Kështu, këtë të hënë autoritetet kanë shpallur në kërkim 2 persona, A. Gj., 22 vjeç, dhe Xh. H., 23 vjeç, të dy banues në Tiranë, për akuzën e vrasjes me dashje e mbetur në tentativë e kryer në bashkëpunim. Ndërsa në pranga ka përfunduar një tjetër person, i cili dyshohet se ka ndihmuar autorin në krim.
“Këta dy shtetas ditën e djeshme rreth orës 21:10, në bulevardin “Bajram Curri” pas një konflikti për motive të dobëta kanë tentuar të vrasin me armë zjarri shtetasin A. B., 25 vjeç, banues në Tiranë, i cili ka pësuar një gërvishtje të lehtë në kofshën e djathtë dhe më pas janë larguar nga vendi i ngjarjes me mjetin tip “Opel” në përdorim të shtetasit M. Gj”, sqarohet në një njoftim.
Ndërsa në kërkim u shpall M. Gj., 23 vjeç, banues në Tiranë, pasi sipas policisë ka ndihmuar dy autorët të largohen nga vendi i ngjarjes me mjetin tip “Opel”.
Në vendngjarje janë gjetur 3 gëzhoja të qitura nga një pistoletë, të cilat janë sekuestruar në cilësinë e provës materiale.
Një procedim në gjendje të lirë ka nisur edhe për 25-vjeçarin e dëmtuar, pasi gjatë kontrollit fizik të ushtruar iu gjet 0.8 gramë lëndë kanabis.
