14 Maj 1998 – Vdes këngëtari i mirënjohur italo-amerikan Frank Sinatra
Këngëtari dhe aktori legjendar Frank Sinatra, vdes nga një atak kardiak në Los Anxheles, në moshën 82-vjeçare. Sinatra lindi në një familje italo-amerikane në Nju Xhersi, për t’u bërë superstari i parë i muzikës moderne, me një karrierë madhështore që zgjati më shumë se 5 dekada.
Përveç suksesit të tij të madh muzikor, Sinatra u shfaq në 58 filma. Më 1953 ai fitoi një Academy Award si aktori më i mirë mbështetës, ndërsa pak vite më vonë u nominua
për një çmim Oskar. Sinatra u martua katër herë, dhe pati 3 fëmijë. Fama e tij si këngëtar
dhe aktor, nuk fshehu megjithatë disa anë të errëta të jetës së tij.
Ai do të pranonte më vonë se ”ndoshta do të kishte përfunduar në rrugët e krimit”, nëse nuk do të kishte qenë për interesin e tij mbi muzikën. FBI-ja amerikane e mbajti për shumë kohë nën vëzhgim, duke faktuar lidhjet e tij me mafiozë të njohur si Al Kapone. Gjithashtu, dyshohet se Sinatra ka qenë një agjent i CIA-s me pseudonimin “Syri Blu”.
Kjo është pranuar edhe nga vajza e tij, Tina, sipas së cilës i ati i bënte shpesh favore për CIA-n. Ai nuk ishte një spiun në kuptimin tradicional, por vepronte si një ndërlidhës i fshehtë për ta. Po çfarë ndërlidhte ai? Njerëz. Meqenëse Sinatra udhëtonte nëpër botë me avionë çarter privatë, tregon vajza e tij, CIA e kontaktonte atë dhe i jepte dikë për ta transportuar, në rastet kur agjencia nuk donte të linte gjurmë.
14 Maj 1955 – Themelohet në bllokun komunist Pakti i Varshavës
Më 14 maj 1955, nënshkruhet në kryeqytetin polak, Varshëvë “Marrëveshja e miqësisë, bashkëpunimit dhe ndihmës së ndërsjellë” midis Shqipërisë, Bullgarisë, Hungarisë, Gjermanisë Lindore, Polonisë, Rumanisë, Bashkimit Sovjetik dhe Çekosllovakisë. Ky akt, ishte një reagim i komunistëve ndaj krijimit të NATO-s 6 vite më patë.
Pakti i Varshavës, u pa në Perëndim si një kërcënim potencial ushtarak, si një shenjë e dominimit komunist, dhe një kundërshtar i kapitalizmit amerikan. Traktati kishte në fillim një afat 20-vjeçar dhe 10 vjet të tjera pas kësaj, me kushtin që asnjë nga anëtarët të mos braktiste aleancën. Megjithatë, në vitin 1962, Shqipëria ndërpreu pjesëmarrjen e saj në veprimet e Paktit, dhe u largua zyrtarisht nga aleanca më 1968.
Në vitin 1990, Hungaria deklaroi se nuk do të merrte më pjesë në funksionet ushtarake të paktit, ndërsa doli prej tij më 1991, së bashku me Çekosllovakinë dhe Poloninë. Edhe Gjermania Lindore u tërhoq më 1990, pasi u ribashkua me Gjermaninë Perëndimore. Në këto kushte, më 1991, 6 vendet e mbetura vendosën shpërbërjen e paktit.
14 Maj 1948 – Izraelitët shpallin themelimin e shtetit të tyre
Kreu i agjencisë hebraike David Ben-Gurion, shpall në Tel Aviv krijimin e shtetin e Izraelit, duke themeluar shtetin e parë hebre në 2000 vjet. Ky akt u prit me zemërim nga vendet arabe. Pak orë më vonë nisën përleshjet mes hebrenjve dhe arabëve, pas tërheqjes së ushtrisë britanike, ndërsa Egjipti ndërmori një sulm ajror kundër Izraelit po atë mbrëmje. Sulmit iu bashkuan të nesërmen Transjordania, Siria, Libani dhe Iraku.
Megjithëse të armatosur keq, izraelitët arritën t’i rezistonin ushtrive arabe, dhe pak ditë më vonë të pushtonin territore kyçe si Galileja, Bregu Perëndimor dhe një rrip territori që lidh rajonin bregdetar me pjesën perëndimore të Jerusalemit.
Në vitin 1949, një armëpushimi i ndërmjetësuar nga OKB-ja, i la Izraelit kontrollin e përhershëm të këtij territori të pushtuar. Largimi i qindra mijëra arabëve palestinezë nga Izraeli gjatë luftës, e la vendin me një shumicë hebreje të konsiderueshme.
14 Maj 1948 – Policia merr shenjat e gishtërinjve të 40 mijë personave, për të zbardhur vrasjen e një fëmije
Përdhunimi dhe vrasja brutale e një të mituri në qytetin anglez Blekbërn, shënon fillimin e një hetimi të pazakontë. Tre-vjeçari Devaney June, ndodhej në spitalin e qytetit për shkak se ishte prekur nga pneumonia, kur u rrëmbye nga shtrati. Infermieret e zbuluan zhdukjen e tij pak minuta më vonë.
Policia nisi një kërkim intensiv, teksa 2 orë më pas, vogëlushi u gjet i pajetë, me fraktura të shumta të kokë. Autopsia përcaktoi se Devaney ishte përdhunuar, dhe më pas ishte vrarë. Krimi tronditi mbarë qytetin. Policia nisi të marrë shenjat e gishtërinjve të elementëve të njohur kriminalë.
Kur kjo nuk dha rezultat, inspektori i policisë urdhëroi në mënyrë të paprecedentë, marrjen e shenjave të gishtërinjve të thuajse të gjithë meshkujve të qytetit, nga adoleshentët tek të moshuarit. Pas 2 muajsh policia kishte marrë shenjat e gishtërinjve të mbi 40.000 personave, duke mbërritur më në fund tek autori, Peter Griffiths.
Gjurmët e këmbëve të tij përputheshin me ato që gjendeshin në vendin e ngjarjes. Kur u përputhën edhe gjurmët e gishtërinjve, ai pranoi krimin e tmerrshëm, duke fajësuar përdorimin e alkoolit. Griffiths u shpall fajtor, dhe u dënua më vdekje me varje në litar më 1949.
14 Maj 1800 – Në SHBA, nis transferimi i qeverisë amerikane në kryeqytetin e ri të SHBA-së, nga Filadelfia në Uashington.
14 Maj 1939 – Lina Medina, bëhet nëna më e re e konfirmuar në historinë mjekësore, në moshën 5-vjeçare.
14 Maj 1940 – Lufta e Dytë Botërore:Beteja e Holandës përfundon me dorëzimin ndaj Gjermanisë naziste.
14 Maj 1970 – Andreas Baader lirohet nga paraburgimi nga Ulrike Meinhof, Gudrun Ensslin dhe të tjerë, një moment i rëndësishëm në formimin e grupimit terrorist gjerman “Ushtria e Kuqe”.
14 Maj 988 – Një shofer i dehur që udhëtonte në drejtimin e gabuar në Kentaki të SHBA-së, godet një autobus shkollor, ku udhëtonin mbante një grup të rinjsh të kishës. Njëzet e shtatë persona vdesin nga përplasja dhe zjarri që pasoi. / TIRANA TODAY/
