Unioni i Gazetarëve Shqiptarë, një nga unionet më serioze në trajtimin e problematikave të gazetarëve në vend, është lënë në mënyrë të paprecedentë jashtë axhendës së diskutimeve në takimin e organizuar nga AMA me drejtuesit e Komisionit Parlamentar të Medias.
Duke u ndeshur me një qëndrim të tillë të drejtuesve të Autoritetit të Mediave Audiovizive, kreu i Unionit të Gazetarëve Shqiptarë, Aleksandër Çipa u largua në shenjë proteste, ndaj mospërfshirjes në axhendën e diskutimeve të problematikave që lidhen me gazetarët dhe që do të bëheshin të ditura nga UGSH-ja.
“Në listën e diskutimeve të këtij takimi ishin renditur organizatat e vjetra dhe të reja, por mungonte Unioni i Gazetareve Shqiptare, “organizata më e zëshme në komunitetin e gazetarëve profesionistë të vendit dhe më aktivja në mbrojtje dhe denoncim të situatës kritike në të cilën kalojnë sot gazetarët e vendit”, thekson Çipa në deklaratën e tij.
