Besnik Hasi është një ndër futbollistët dhe trajnerët shqiptar që ka ndërtuar një karrierë të madhe në arenën ndërkombëtare. Si futbollist Hasi ka pasur një shans të artë të luaj në kampionatin spanjoll, por arsyeja pse është tërhequr nga ajo kontratë do ti bëjë krenarë të gjithë. Ishte lufta e Kosovës dhe Hasi ishte pjesë e ekipit të Genk në Belgjikë, por një ofertë tunduese vjen në drejtim të tij e cila u refuzua.
“Unë mendoj se, si futbollist kam arritur maksimumin. Kam pasur një moment që u ktheva nga Gjermania te Genku, sapo ishim shpallur kampionë në Belgjikë dhe kisha një ofertë nga Real Sociedad. E kam ende në shtëpi ofertën e tyre, e ruaj ende. Në atë kohë ishte lufta në Kosovë dhe tifozët e Genkut shprehën solidaritetin e tyre, sepse unë kisha filluar të mblidhja ndihma për ta.
Gjakovarët kishin lënë shtëpitë dhe ishin strehuar në Shqipëri, rrinin në kampet përreth Tiranës dhe Durrësit dhe ata, kur u shpallëm kampionë, më ndihmuan shumë. Ndihmuan rreth 350 familje, me ndihma modeste, por ishte një shpresë për të gjithë. Dhe ngaqë ata treguan aq shumë mirësi për mua, unë nuk mund të pranoja ofertën e Sociedadit dhe i thashë menaxherit se nuk doja të shkoja. ‘Do të flasim me presidentin’ më tha, por unë refuzova”, shprehet Hasi.
