Eliminimi i Juventusit nga Champions League në sekondat e fundit nga ajo penallti nuk është harruar akoma. Ajo e ka kaluar normën e spotivitetit dhe situata ka marrë një tjetër rrjedhë, atë të kërcënimeve. Tifozë të tërbuar kanë vënë në shënjestrën e tyre bashkëshorten e arbitrit Michael Oliver, Lucy, në profilin e së cilës në rrjetet sociale nuk i kursyen fyerjet seksiste, madje arritën sa të bënin edhe kërcënime me vdekje në drejtim të vet arbitrit.
Komentet fyese në drejtim të Michael Oliver e bashkëshortes së tij, duke i përkthyer frazat nga gjuha italiane në atë angleze, janë publikuar nga BBC. Ndërkohë, policia britanike ka hapur menjëherë hetimet për fyerjet ndaj Lucy Oliver, e cila ka marrë mesazhe kërcënuese edhe nëpërmjet mesazheve telefonike.
Ndeshja mes Realit të Madridit dhe Juventusit u mbyll në mënyrë dramatike për bardhezinjtë, teksa Buffon u ndëshkua me karton të kuq në minutën e 93-të, ndërsa Realit iu akordua një 11-metërsh që u shndërrua në gol nga Ronaldo, duke bërë që madrilenët të kalojnë në gjysmëfinalet e Championsit.
