Pasi ka pushtuar rajonin Afrin që kontrollohej nga milicia e kurdëve të Sirisë, Turqia ka njoftuar sot se qyteti verior në Siri, Tal Rifaat do të jetë caku i ri i ushtrisë turke.
“Me dëshirën e Zotit ne do të sigurohemi që ky operacion të arrijë qëllimin e vet pasi të marrim kontrollin e Tal Rifaatit për një kohë të shkurtër”, ka thënë presidenti turk Recep Tayyip Erdogan në Trabzon.
Më 20 janar, Ankaraja ka nisur një ofensivë në tokë dhe ajër në rajonin Afrin të Sirisë për të larguar anëtarët e Njësiteve për Mbrojtjen e Popullit (YPG) nga kjo zonë.
Tuqia e konsideron YPG-në organizatë terroriste, ndonëse e njëjta shihet si lojtare kyçe nga Shtetet e Bashkuara në luftën kundër militantëve të grupit ekstremist Shteti Islamik në Siri.
Më 18 mars, forcat turke dhe aleatët rebelë kanë marrë tërë kontrollin e enklavës Afrin, pasi pjesa më e madhe e pjesëtarëve të YPG-së janë larguar pa luftuar.
Pushtimi i Afrinit është parë si hap i madh për Turqinë, e cila kërkon të shtrijë kontrollin e saj në kufirin verior me Sirinë.
