Heung-Min Son pritet që ti mungojë ekipit të Tottenhamit për dy vite dhe arsyeja është mjaft qesharake, pasi ka të ngjarë që të rekrutohet ushtarë. Korea e Jugut i ka ligjet të tilla që çdo mashkull nën 28 vjeç është i detyruar të kryej shërbimin ushtarak, i cili zgjat nga 21 në 36 muaj, në varësi të sektorit ku do të kryej shërbimin.
Sipas tabloidit “The Sun”, Son, ashtu sikurse edhe të gjithë koreano-jugorët e tjerë nuk mund të refuzojë kryerjen e këtij shërbimi. Nëse ai e bën këtë, atëherë e pret një dënim me dy vite burg. Kjo do të thotë se sulmuesi i Tottenhamit, me shumë gjasa nuk do të jetë në dispozicion të stafit teknik të klubit londinez në sezonet 2019-2020 dhe 2020-2021. Megjithatë ka një pikë që mund ta ndihmojë Son, që t’i shpëtojë shërbimit ushtarak.
Ligji në Korenë e Jugut përjashton nga detyrimi i kryerjes së këtij shërbimi vetëm ata sportistë, të cilët bëjnë paraqitje të shkëlqyera në turnetë ndërkombëtare. Kjo do të thotë se, nëse Son do të shkëlqejë në Botërorin e Rusisë, atëherë nuk do të jetë i detyruar t’u bashkohet Forcave të Armatosura të vendit të tij.
Koreja e Jugut ndodhet në Grupin F të Botërorit, së bashku me Gjermaninë, Suedinë dhe Meksikën, e ajo që duhet të bëjë është që të përsërisë rezultatin e Kupës së Botës së vitit 2002, kur arriti deri në gjysmëfinalet e atij turneu.
Në këtë kompeticion, për Korenë e Jugut duket se është e vështirë të shkojë kaq larg, kështu që për Son, opsioni më i mirë që i mbetet për të shkëlqyer janë Lojërat Aziatike, që do të mbahen nga 18 gushti deri më 2 shtator të këtij viti në Indonezi, ku Koreja e Jugut do të kërkojë të mbrojë titullin e fituar në turneun e futbollit.
