Kreu i Lëvizjes Vetëvendosje i ka dërguar një letër publike kryeministrit të Kosovës, Ramush Haradinaj, të cilit i kërkon që të mos ratifikojnë marrëveshjen e Demarkacionit, pa u korrigjuar fillimisht.
Por, nuk ka vonuar as përgjigja e kryeministrit, i cili ka thënë se e kupton presionin nga Kurti që fillimisht të ishte korrigjuar marrëveshja e pastaj të ratifikohet, por që sipas tij kjo do të nënkuptonte dalje prej marrëveshjes.
“Më ka shkruar një letër kryetari i Lëvizjes Vetëvendosje z. Kurti me të cilin ne kemi qenë bashkë në kundërshtim të versionit të gabuar. Unë e kuptoj presionin e z.Kurti se kish qenë ma mirë me e korrigjuar përpara me e kthye në Çakorr dhe në Kullë. Por kjo nënkupton dalje prej një marrëveshje. Pas ratifikimit nga ana e Kosovës nuk është humb asnjë argument i korrektimit”, ka thënë ai në RTK.
Më tej, Haradinaj i është lutur Kurtit dhe deputetëve të tjerë të VV-së që ta votojnë pro marrëveshjes së demarkacionit.
“Tani iu kisha lut z.Kurtit edhe deputetët e Vetëvendosjes, njëkohësisht i kisha lut edhe deputetët e tjerë që e shoh se kanë tani mospajtime brenda VV-së. Janë krijuar dy drejtime politike. Visar Ymeri e të gjithë ata tjerët i kisha lut që ta konsiderojnë dhënien e votës edhe të mos e lejojnë Kosovën që të ndodhet në pozita të presioneve për votë”, tha Haradinaj.
