Kohët e fundit, fenomeni i grabitjes është kthyer në një problematikë të madhe në vendin tonë, të cilat po kryhen natën, por edhe në mes të ditës, pa asnjë problem. Madje, në një rast në Fier, gjatë grabitjes së një pike Exchange, u plagosën dy persona, njëri prej të cilëve ndërroi jetë në spital.
Një tjetër vjedhje spektakolare është shënuar në kryeqytet, ku është grabitur një lloto sporti në afërsi të Liqenit të Thatë. Siç duket në videon e publikuar nga joq.al, hajdutët ndalojnë në anë të rrugës dhe më pas nisin të marrin televizorët.
Në një periudhë kohore prej vetëm 1 minutë e gjysmë, ata arrijnë të marrin 8 televizorë, të cilët i fusin në një automjet dhe më pas largohen.
Pronari i llotos, i cili ka mundur të sigurojë filmimet e vjedhjes nga kamerat e një tjetër biznesi, tregon për joq.al se ka bërë denoncimin në polici një natë më pas, por uniformat blu janë tallur me të.
“Bëra denoncimin por deri tani asnjë gjë. Policia thotë që s’mund ta identifikojë targën, ndërkohë që me pak punë mund të dallohet. S’e kanë vënë ujin në zjarr. Apeli im është që ta gjejnë kush mund ta ketë bërë sepse makina është e dukshme dhe targa del lehtësisht në laborator”, shkruan ai.
