Rreth një javë më parë qyteti i Shkodrës u trondit nga një ngjarje e paprecedent, ku një person sulmoi me thikë trajnerin e Vllaznisë, Ernest Gjokën. Pak çaste pasi ndodhi sulmi, policia kishte ndaluar disa persona që ndodheshin aty pranë, ku vetëm sot arrin të verifikohen se kanë qenë ata autorët e kësaj ngjarjeje. I pari që raportoi arrestimin e autorëve ishte ministri i Brendshëm Fatmir Xhafaj, i ftuar në emisionin “Përballë”.
“Policia dhe prokuroria sapo u njoftova, kane arrestuar autorët e plagosjes dhe sulmit te trajnerit te ekipit te ‘Vllaznise’ ne Shkodër”, deklaroi Xhafaj.
Njoftimi i policisë:
Shkodër, zbardhet dhe dokumentohet autorësia e sulmit dhe goditjes së trajnerit të “Vllaznisë”, Ernest Gjoka. Arrestohen 2 autorët e ngjarjes.
Sot, strukturat e Drejtorisë Vendore dhe Komisariatit të Policisë Shkodër, në bashkëpunim të ngushtë me Prokurorinë, falë një pune intensive hetimore dhe të pandërprerë, identifikuan dhe arrestuan shtetasit:
Nehat Fojleta, 19 vjeç, banues në Shkodër
Sehar Xhenje, 21 vjeç, banues në Shkodër
Arrestimi i tyre u bë pasi më 22 shkurt 2018, rreth orës 17:00, në afërsi të fushës sportive, shtetasi Nehat Fojleta është afruar duke kanosur dhe goditur trajnerin e ekipit të futbollit “Vllaznia”. Më pas ai është larguar me mjetin tip “Benz” me targa AA 282 KR. Drejtues mjeti ka qenë shtetasi Sehar Xhenje i cili ka ndihmuar të largohen nga vendi i ngjarjes.
Në cilësinë e provës materiale u sekuestrua mjeti që shërbeu për largimin e autorit të dyshuar pas sulmit.
Në bashkëpunim të ngushtë me Prokurorinë, po punohet intensivisht për zbardhjen e motiveve dhe qëllimit të kësaj ngjarjeje
Materialet iu referuan Prokurorisë së Rrethit Gjyqësor Shkodër, për veprën penale “Vrasje e mbetur në tentativë” dhe “Deklarata e rreme përpara oficerit të policisë gjyqësore”
