Presidenti rus Vladimir Putin urdhëroi të hënën një armëpushim humanitar prej 5 orësh, në rrethinën e rrethuar të Damaskut, pas raportimeve të sulmeve me gaz klorik.
Sipas agjencisë shtetëore të lajmeve Tass, Putin urdhëroi pushimin nga ora 09:00, deri në orën 14:00 që do të nisë gjatë ditës së nesërme, si një përpjekje për të parandaluar viktimat civile.
Mësohet se po ashtu do të hapet një korridor, për të lejuar civilët që të largohen. Rusia është aleati kryesor i regjimit sirian në një luftë civile që ka rrënuar vendin prej 7 vitesh, tashmë një luftë e përqendruar në Ghoutan Lindore, një zonë e mbajtur nga rebelët.
Ndërhyrja ruse me trupa dhe armë ka ndihmuar në animin e balancës në favor të presidentit Bashar al-Assad. Territori i rrethuar nga rebelët pranë Damaskut, ku 393,000 civilë janë bllokuar, ka qenë nën bombardime të forta nga forcat qeveritare me mbështetje ruse.
Më shumë se 550 vetë janë vrarë në tetë ditë, thotë një grup monitorues. Ministri rus i Mbrojtjes Sergei Shoigu bëri njoftimin për “pauzën humanitare”, duke thënë se do të zgjasë çdo ditë nga ora 09:00 deri në orën 14:00 lokale, ndërsa pritet të dalin detaje të reja së shpejti.
Këshilli i Sigurimit i Kombeve të Bashkuara njëzëri bëri thirrje për një ndërprerje prej 30 ditësh mbarëkombëtare të armiqësive të shtunën.
Rezoluta kërkoi që “të gjitha palët të ndërpresin luftimet pa vonesë” për të lejuar dërgesat e ndihmës dhe evakuimet mjekësore.
Sekretari i Përgjithshëm i OKB-së Antonio Guterres e ka përshkruar situatën në Ghouta Lindore si “ferr në Tokë”, dhe kërkoi veprim të menjëhershëm. TIRANA TODAY
