Interi është zhytur në një krizë loje dhe rezultatesh në Serinë A, teksa në 10 javët e fundit ka marrë vetëm 9 pikë, duke hedhur poshtë atë fillim mbresëlënës, që e mbajti në krye të kampionatit deri në javën e parë të dhjetorit.
Tani zikaltrit do të kenë 3 ndeshje radhazi në ‘San Siro’, ku do të kërkojnë të lënë pas këtë moment negative dhe të rikthehen në zonën Champions, që ishte edhe objektivi i fillim-sezonit.
Të shtunën në mbrëmje në ‘San Siro’ do të zbresë Benevento, skuadra që mbyll renditjen e Serisë A dhe fitorja kthehet në një detyrim për zikaltrit, para derbit të 04 Marsit dhe sfidës me Napolin 1 javë më pas.
Spalletti shpreson shumë te rikuperimi i dyshes Icardi-Perisiç, të cilët së bashku kanë shënuar dhe asistur më shumë se totali i skuadrës, ndërsa kanë qenë deçizivë në pikët që ka grumbulluar skuadra.
Që të dy janë stërvitur të dielën dhe sot kanë filluar ngarkesën e plotë me dy seanca, për të qenë në dispozicion të Spallettit të shtunën në mbrëmje. Gjithsesi, trajneri zikaltër po përgatit edhe një minirevolucion, në skuadër, veçanërisht në repartin e avancuar, ku skuadra po tregon se nuk është e kthjellët sa duhet dhe sulmon në mënyrë sporadike.
Kështu blerja e janarit, braziliani Rafinha pritet ta nisë sfidën nga fillimi, pasi duket të ketë arritur nëj gjendje mjaft të mirë fizike dhe këtë e ka treguar në minutat që Spalletti e aktivizuar deri tani.
Në sulm pritet të konfirmohet Karamoh në krahun e djathtë, ndërsa Perisiç dhe Icardi do të plotësojnë repartin. Me Karamoh-Icardi-Perisiç dhe Rafinhën pas shpinës së tyre, zikaltrit pritet të kenë gjithçka I duhet repartit sulmues, shpejtësi, freski, fantazi dhe një finalizues të klasit të lartë.
Në mesin e fushës pritet që të pushojë Borja Valero, për të qenë i gatshëm për dy sfidat pasardhëse me Milanin dhe Napolin, ndërsa Gagliardini dhe Vecino do të jenë barriera e parë e sulmeve të kundërshtarit. Në mbrojtje konfirmohen Cancelo, D’Ambrosio dhe Skriniar, ndërsa në vend të Ranocchias pritet të luajë Lisandro Lopes.
