Ndërsa Shqipëria kërkon hapjen e negociatave në qershor të këtij vit, nga ana tjetër kjo është e shoqëruar me pengesa, pasi ende nuk ka hapa konkrete në diskutimet me Greqinë.
Pavarësisht retorikës politike, vendi ynë nuk shikohet me të njëjtin sy nga vendet anëtarë të BE-së. Ministri Bushati i pranishëm në Holandë, ka folur në lidhje ne prespektivën evropiane të Shqipërisë, por edhe rendësinë e anëtarësimit për vendet e tjera të Ballkanit Perëndimor. Sipas tij, Ballkani Perëndimor garanton qetësi për kontinentin e vjetër, ndërsa vendet e unionit duhet të marrin parasysh këtë fakt.
“Që kur Shqipëria nisi udhëtimin e saj antikomunist, prioriteti ynë kombëtar ka qenë dhe është anëtarësimi në Bashkimin Europian. E kemi pasur gjithmonë të qartë që rruga jonë drejt BE-së është e patjetërsueshme. Ballkani nuk ka alternativë tjetër përveç përfshirjes në familjen evropiane. Shqiperia ka bërë përparim në plotësimin e prioriteteve, përmbushja e të cilave forcon themelet e një demokracie funksionale të bazuar në shtetin e së drejtës dhe në një ekonomi të zhvilluar, të aftë për të sjellë prosperitet për qytetarët”, tha ministri në fjalën e tij.
Ministri bëri një panoramë të reformave dhe rezultateve të Shqipërisë në rrugën drejt Europës, që nga vitet e para pas 90-ës deri në ditët e sotme kur Shqipëria po troket në derën e BE-së për hapjen e bisedimeve për anëtarësim.
Sipas tij, është koha e duhur që BE të hapë dyert për Ballkanin Perëndimor, pasi evropa bëhet më e fortë. “Marrëdhëniet me BE dhe perspektiva e integrimit evropian janë çelësi I stabilitetit dhe ecurisë së reformave në Ballkanin Perëndimor”, u shpreh ministri, i cili shtoi se shumë nga sfidat me të cilat përballet sot Ballkani Perëndimor, janë të njëjta edhe për vendet e tjera, përfshirë edhe vendet anëtare të BE-së.
Rrjedhimisht, vetëm duke punuar së bashku, Evropa mund të jetë më e fortë për të përballuar sfidat, për të garantuar siguri, mirëqënie sociale dhe prosperitet për qytetarët e saj.
